Landsréttur kvað í dag upp dóm yfir Vilhjálmi Frey Björnssyni og staðfesti dóm Héraðsdóms Reykjavíkur sem hafði sakfellt hann fyrir að nauðga konu sem hann hafði keypt vændi af, svipta hana frelsi sínu og sérlega hættulega líkamsárás gegn henni. Þyngdi Landsréttur dóm yfir Vilhjálmi úr fjögurra ára fangelsi í fjögurra og hálfs árs fangelsi.
Eins og fram kom í fréttum DV af meðferð málsins fyrir Héraðsdómi var Vilhjálmur ákærður fyrir að hafa ráðist á konuna eftir að hún hafnaði kröfum hans um endurgreiðslu. Var hann sagður hafa meinað henni útgöngu og svipt hana frelsi í minnst þrjár klukkustundir og hafa á þeim tíma þvingað konuna ítrekað til samræðis í leggöng, endaþarm, munnmök og til að sleikja á honum endaþarminn.
Vilhjálmur tók konuna hálstaki minnst tvisvar og sló hana endurtekið í andlit og búk með þeim afleiðingum að konan hlaut brot á augnatóft og á vanga- og kjálkabeinum, mar á andliti, hálsi og upphandlegg. Húðblæðingar á hálsi og punktblæðingar í andliti og slímhúð augna og í munni og þar að auki yfirborðsáverka á andlit og búk.
Landsréttur staðfesti niðurstöðu héraðsdóms að öllu leyti. Sakfelling Vilhjálms fyrir sérlega hættulega líkamsárás, frelsissviptingu og vændiskaup var staðfest. Var sú niðurstaða einnig staðfest að sakfella Vilhjálm fyrir að nauðga konunni í endaþarm en sýkna hann af ákæru um að hafa nauðgað henni í leggöng og þvinga hana til munnmaka og að sleikja endaþarm hans. Í dómnum er forsenda þess sögð vera sú að framburður konunnar um að Vilhjálmur hafi nauðgað henni í endaþarm hafi frá upphafi verið stöðugur en hún hafi breytt framburði sínum um aðra hluta nauðgunarinnar sem Vilhjálmur var ákærður fyrir og sagst ekki muna eftir þeim.
Eins og áður segir þyngdi Landsréttur fangelsisdóm héraðsdóms yfir Vilhjálmi um hálft ár. Í dómnum segir að við ákörðun refsingar hafi verið litið til þess að atlaga Vilhjálms að konunni hafi verið ofsafengin og gróf og framin á sérstaklega sársaukafullan og meiðandi hátt. Með háttsemi sinni hafi Vilhjálmur valdið konunni alvarlegum líkamlegum áverkum og brotið gegn kynfrelsi hennar og þeim trúnaði sem hún hafi sýnt honum með komu sinni til hans.
Einnig kemur fram að dómurinn hafi verið þyngdur vegna fyrri brota Vilhjálms.
Dóm Landsréttar yfir Vilhjálmi Frey Björnssyni má nálgast hér.
