Fleiri hlynntari sölu léttvíns og bjórs í matvöruverslunum en sterkra drykkja – Ólík sýn Viðreisnarfólks og Vinstri grænna
Stuðningur við sölu áfengis í matvöruverslunum dregst saman í fyrsta skiptið í sjö ár. Engu að síður eru fleiri sem vilja fá áfengi í matvöruverslanir en eru andvígir því. Munur eftir stjórnmálaskoðunum er umtalsverður.
Þetta kemur fram í nýrri könnun Maskínu, sem hefur framkvæmt kannanir um málefnið síðan árið 2016.
Þegar spurt er um létt áfengi, það er léttvín og bjór, eru 49 prósent hlynnt því að það verði selt í búðum. 37 prósent eru andvíg og 13 prósent hafa ekki skoðun á málefninu. 31 prósent eru mjög hlynnt og 26 prósent mjög andvíg.
Í könnun Maskínu fyrir ári síðan voru 52 prósent hlynnt en 33 prósent andvíg. Þetta er því breyting um 3 til 4 prósent.
Til samanburðar má nefna að árið 2017 voru aðeins 33 prósent hlynnt léttu áfengi í matvöruverslunum en 57 prósent á móti. Það var árið 2022 sem hlynntir voru orðnir fleiri en andvígir.
Meiri andstaða við sterkt áfengi
Svipaðar breytingar má sjá þegar kemur að sterku áfengi, það er áfengi eins og vodka sem hefur meira en 22 prósent áfengisinnihald. 23 prósent eru hlynnt sölu þess í matvöruverslunum en 58 prósent á móti. Í fyrra voru 25 prósent hlynnt en 55 prósent andvíg.
Því eru meira en tvöfalt fleiri andvígir því að sterkt vín verði selt í matvöruverslunum en eru fylgjandi. Hafa ber þó í huga að árið 2017 voru aðeins 15 prósent fylgjandi og 74 prósent andvíg.
Eldra fólk og landsbyggðarfólk andvígt
Þegar niðurstöðurnar eru greindar eftir hópum sést að yngra fólk er almennt mun jákvæðara fyrir að fá áfengi í matvöruverslanir en eldra fólk. Til dæmis eru 60 prósent fólks á fertugsaldri hlynnt því að fá létt áfengi í matvöruverslanir en aðeins 29 prósent fólks eldra en sextugt.
55 prósent karla eru fylgjandi en 43 prósent kvenna.
Fólk á höfuðborgarsvæðinu er einnig nokkuð hlynntara en fólk á landsbyggðinni. Í Reykjavík eru 54 prósent hlynnt en á Vesturlandi og Vestfjörðum aðeins 36 prósent.
Lítill munur mælist á milli menntunarhópa og tekjuhópa. Þó eru þau sem eru með minni menntun og hærri laun almennt hlynntust.
Viðreisn og VG á sitthvorum ásnum
Þó nokkur munur mælist á milli stuðningsfólks stjórnmálaflokkanna. Stuðningsfólk Viðreisnar er áberandi hlynntast því að fá létt áfengi í búðir, 73 prósent. 63 prósent Sjálfstæðismanna, 51 prósent Miðflokksmanna, 49 prósent Framsóknarmanna, 45 prósent Samfylkingarfólks, 40 prósent stuðningsfólks Flokks fólksins, 38 prósent Sósíalista, 34 prósent Pírata en aðeins 19 prósent Vinstri grænna.
Könnunin var gerð dagana 7. til 13. febrúar. Svarendur voru 967.
