Eins og svo oft áður aðfaranótt sunnudags kom talsverður fjöldi verkefna inn á borð Lögreglunnar á höfuðborgarsvæðinu í nótt og eins og oft vill verða komu flest þeirra upp í miðborg Reykjavíkur. Þar á meðal var tilkynnt um blóðugan manni á gangi en lögreglan fann hann þó ekki. Komu þessi verkefni til kasta lögreglustöðvarinnar á Hverfisgötu.

Helstu verkefnin voru þau að tilkynnt var um mann í miðbænum sem hafði verið að hrækja á dyraverði. Við afskipti lögreglu neitaði aðilinn að segja til nafns og lét öllum illum látum. Hann verður vistaður í fangageymslu þangað til hægt er að ræða við hann.

Um eitt leytið í nótt var tilkynnt um blóðugan mann á gangi í vesturbæ Reykjavíkur. Maðurinn var farinn þegar lögregla kom á vettvang.

Tilkynnt var um slagsmál utan við skemmtistað í miðbænum. Þegar lögregla kom á staðinn urðu lögreglumenn vitni að áframhaldandi líkamsárás sem varð til þess að tveir aðilar voru handteknir og gista nú fangageymslur í þágu rannsóknar málsins.

Lögreglunni barst tilkynning um mann sem hótaði að stinga annan vegna deilna þeirra á milli. Við skoðun á málinu kom í ljós að maðurinn var óvopnaður, mjög ölvaður og ekki líklegur til ofbeldis. Málið er í rannsókn.

Tilkynnt var um ölvaðan mann sem reyndi að komast inn í byggingar í miðbænum, líklega í leit að skjóli. Maðurinn var fluttur á lögreglustöð þar sem í ljós kom að hann var of ölvaður til að sýsla með sín mál. Manninum var boðin gisting í fangageymslu sem hann þáði.

Upp úr klukkan fjögur í nótt réðust nokkrir aðilar á einn í miðbænum. Árásarþoli var ekki mikið slasaður en lögreglan leitar nú árásaraðila og er málið í rannsókn.