Kristrún Frostadóttir formaður Samfylkingarinnar auglýsir á Facebook-síðu sinni eftir fólki sem tilbúið er að styrkja flokkinn mánaðarlega til að byggja upp kosningasjóð.

„Fullt af fólki vill styðja við það sem við erum að gera í Samfylkingunni. Enda er raunhæfur möguleiki á að við fáum nýja ríkisstjórn á næsta kjörtímabili – undir forystu jafnaðarfólks. En það er mikil vinna framundan. Og margar leiðir til að leggja sitt að mörkum,“ skrifar Kristrún.

Hún vísar því næst á vefsvæðið styrkja.is þar sem hægt er að skrá sig sem styrktaraðili Samfylkingarinnar. Á vefsvæðinu er hægt að styrkja ýmis konar félagasamtök hér á landi og ekki síst góðgerðarfélög.

Á svæði Samfylkingarinnar á styrkja.is kemur fram að hægt er að styrkja flokkinn einu sinni eða mánaðarlega. Fólki býðst að styrkja flokkinn um 2.000, 3.000 eða 5.000 krónur á mánuði eða að velja upphæð sem viðkomandi greiðir mánaðarlega til flokksins. Tekið er fram að hver einstaklingur geti að hámarki styrkt flokkinn um 550.000 krónur á ári og að öll framlög einstaklinga sem fari yfir 300.000 krónur séu birt opinberlega í ársreikingi flokksins.

Kristrún segir í færslunni að þeim sem skrái sig fyrir mánaðarlegum styrk verði haldið upplýstum um hvernig fénu verður ráðstafað og að söfnunin fari vel af stað:

„Fórum af stað með þetta í gær og strax fjöldi fólks búinn að skrá sig. Takk fyrir það! Skiptir mig máli – mun fylgjast með þessu og planið er að upplýsa mánaðarlega styrktaraðila um stöðuna og nýtingu þeirra fjármuna sem safnast.“