Guðni Th. Jóhannesson forseti Íslands flutti ávarp á Íslensku tónlistarverðlaununum í gærkvöldi áður en hann afhenti Kára Egilssyni verðlaun fyrir útnefningu hans sem bjartasta vonin. Steinunn Ólína Þorsteinsdóttir leikkona fullyrðir í færslu á Facebook-síðu sinni að forsetinn hafi í ávarpi sínu látið RÚV heyra það fyrir að ákveða að taka þátt í Söngvakeppni evrópskra sjónvarpsstöðva þrátt fyrir áskoranir um að gera það ekki í ljósi þess að Ísrael verði meðal þátttökuþjóða. Guðni minntist þó ekki beint á söngvakeppnina í ávarpinu.
Steinunn Ólína skrifar í færslu sinni um ræðu forsetans:
„Tók af allan vafa um hvort þátttaka í Eurovision er viðeigandi að þessu sinni. Hvernig fólk hagar sér á stríðstímum skiptir nefnilega máli. Ætlum við að láta eins og ekkert sé eða í ljósi aðstæðna standa með bræðrum okkar og systrum sem fallin eru eða þjást. Ræðan rassskelti duglega stjórn RUV, yfirmann stofnunarinnar og alla þá sem álíta það viðurkvæmilegt að vera í grínbandalagi við þjóðir sem skipulega útrýma nágrannaþjóð sinni.“
„Ég hef held ég aldrei heyrt Guðna tala af jafn miklum þunga og í þessari ræðu og mér þótti vænt um að heyra hann tjá sig á þennan hátt.“
Eins og áður segir minntist Guðni ekki beint á þátttöku Íslands í söngvakeppninni þeetta árið en ræddi um hvernig list og pólitík geta blandast saman og rifjaði, eins og sagnfræðings er von og vísa, upp sögulegt dæmi um slíkt:
„Og auðvitað er það svo að það getur hæglega gerst að tónlist og hvers kyns afþreying renni saman við eða fari inn á hið pólitíska svið. Komið þið með mér til 1. september 1958. Bresk herskip ösluðu inn í íslenska landhelgi, fyrsta þorskastríðið var hafið. Degi síðar samkvæmt dagskrá Ríkisútvarpsins átti að flytja að kvöldi drottningaróð, Homage to the Queen, eftir Bretann Malcom Arnold: „Nei, ekki aldeilis, eftir þessa innrás.““
„Það var slegið af og í staðinn hetjusinfónía Beethovens. Nú kannski væri hægt að finna dæmi nær okkur í tíma um hvernig tónlist og pólitík blandast saman en þetta væri þá ekki staðurinn eða stundin til þess. Kannski gef ég mér tíma einhvern tímann seinna í það.“
Því næst snéri Guðni sér að því að tala um Kára Egilsson.
Hvort með þessum orðum sínum hafi hann verið að senda RÚV skilaboð verða lesendur að meta sjálfir.
