Maðurinn sem réðst fyrirvaralaust með hníf á tvo starfsmenn verslunarinnar OK Market í Valshverfinu hefur staðið í hótunum við Helga Magnús Gunnarsson, vararíkissaksóknara, og fjölskyldu hans um langt skeið. Frá þessu greinir Helgi Magnús í færslu á Facebook-síðu sinni sem hann veitti DV góðfúslegt leyfi til að birta.
„Þessi maður hefur verið að hóta að drepa mig og mína fjölskyldu í 3 ár og hlaut dóm í Landsrétti fyrir ári síðan,“ skrifar Helgi Magnús í færslunni. Miðað við sögu mannsins hefur Helgi Magnús metið sem svo að fullt tilefni væri til að taka þær alvarlega.
Fram hefur komið að árásarmaðurinn er góðkunningi lögreglunnar og afbrotasaga hans sé löng hérlendis. Hann hefur verið dæmdur í fangelsi fyrir skjalafals og sakfelldur fyrir fjölmörg brot þar á meðal valdstjórnarbrot, brot gegn nálgunarbanni, líkamsárás, húsbrot og brot gegn sóttvarnalögum.
Hann var handtekinn skömmu eftir árásina í OK Market og var úrskurðaður í fjögurra vikna gæsluvarðhald. Það er ákveðinn léttir fyrir Helga Magnús og fjölskyldu hans.
“Ég þarf ekki að búast við honum við útidyrnar með hníf í hönd, né börnin mín og konan, næstu fjórar vikur ef þetta stendur,” skrifar vararíkissaksóknarinn.
Eins og fram hefur komið er síbrotamaðurinn af erlendu bergi brotinn og segir Helgi Magnús í færslunni sér þyki merkilegt að ekki sé búið að vísa manninum af landi brott en telur að það sé merki um forgangsröðun Alþingis.
„Það skiptir greinilega minna máli öryggi okkar sem vinnum í kerfinu fyrir almenning og öryggi fjölskyldna okkar, þar með talið lögreglumanna sem hafa haft af honum afskipti. Heldur skiptir meira máli að veita slíkum manni uppihald og framfærslu úr sameiginlegum sjóðum,“ skrifar Helgi Magnús og klikkir út með að vitna í orð Kára Stefánssonar.
„Ég held að Kári Stef hafi rétt fyrir sér við Íslendingar erum líklega heimskasta þjóð í heimi, í það minnsta sú aumasta,“ skrifar vararíkissaksóknarinn.
