Saksóknari San Diego borgar bað dómara um að fyrirskipa lokun á nuddstofunni Ocean Spa and Health Station. Þar hafi verið stundað vændi og hugsanlega mansal og stunurnar truflað starf biblíuskólans sem stendur við hliðina á henni.
Greint er frá þessu í blaðinu People.
Upp komst um vændið eftir að nemendur biblíuskólans kvörtuðu undan háværum stunum og kynlífshljóðum frá nágrannabyggingunni. Áttu þeir erfitt með að einbeita sér við lestur ritningarinnar undir þessum hljóðum.
Ekki nóg með hljóðin þá sáu nemendurnir tvær manneskjur stunda holdsins fýsnir í vörubíl á bílastæðinu fyrir framan skólann og nuddstofuna. Þetta var um miðjan dag. Þá sá einn nemandi „vaggandi bíl“ á þessu sama bílastæði.
Biblíuskólinn opnaði árið 2022. Eru það einkum ungmenni sem stunda nám, sum undir lögaldri. Sumir karlkyns nemendur hafa kvartað yfir því að starfsmenn nuddstofunnar hafi reynt að tæla þá yfir til sín.
Kvartanirnar rötuðu til lögreglu, sem hafði reyndar verið að rannsaka sömu aðila allt frá árinu 2018. Málið teygði sig til nefnilega annarrar nuddstofu í eigu sömu aðila, þar sem nágrannar höfðu einnig kvartað.
Samkvæmt Mara W. Elliot, saksóknara, hafði verið kvartað yfir því að kvenkyns starfsmenn nuddstofanna hefðu sést í fatnaði sem skildi lítið eftir fyrir ímyndunaraflið. Þá virtist sem svo að opnunartíminn væri mjög frjálslegur.
Leynilögreglumenn voru sendir á annan staðinn til þess að panta nuddþjónustu en þeim var að fyrra bragði boðin kynlífsþjónusta fyrir aukagjald.
Sá staður fékk fyrst viðvörun árið 2019 en var síðan lokað. Þá var Ocean Spa and Health Station opnaður, sem eru reyndar tveir aðskildir staðir en grunur er um vændi á báðum stöðum.
Í gögnum málsins kemur einnig fram að kynlífsþjónusta á nuddstofunni hafði verið auglýst á netinu í meira en þúsund skipti.
Að sögn Elliot er ekki aðeins grunur um að vændi sé stundað á nuddstofunni, heldur einnig mansal.
„Við erum ekki sannfærð um að þessar konur séu að selja vændi af frjálsum og fúsum vilja,“ sagði hún í yfirlýsingu. „Við höfum áhyggjur af velferð þessara starfsmanna.“
Meðal annars sé grunur um að sumir starfsmennirnir hafi sofið á staðnum.
Dómari varð við kröfu Elliot um að loka staðnum en einnig var gerð krafa um 100 þúsund dollara í sekt, eða tæpar 14 milljónir króna, og að eigendurnir greiði þann kostnað sem hefur hlotist af rannsókn málsins.
Rannsókn lögreglu heldur áfram og hugsanlegt er að eigendurnir verði sóttir til saka og þeim gerð refsing.
