Lögreglan hefur þegar yfirheyrt Pétur Jökul Jónasson, sem úrskurðaður var í gæsluvarðhald í fyrradag í tengslum við stóra kókaínmálið.
Fjórir menn hlutu þunga fangelsisdóma í fyrra vegna þess máls, sem snerist um tilraun til að flytja inn til landsins rétt tæplega 100 kg af kókaíni með timbursendingu frá Brasilíu.
Að beiðni íslensku lögreglunnar birti Alþjóðalögreglan Europol eftirlýsingu eftir Pétri Jökli. Lögregla upplýsti í gær að Pétur Jökull hafði komið sjálfviljugur til landsins og verið handtekinn við komuna.
Pétur Jökull var úrskurðaður í vikulangt gæsluvarðhald fyrir Héraðsdómi Reykjavíkur í fyrradag. Grímur Grímsson, yfirlögregluþjónn á miðlægri rannsóknardeild Lögreglunnar á höfuðborgarsvæðisins, segir sjálfgefið að Pétur Jökull hafi þegar verið yfirheyrður:
„Já, það er gert strax þegar fólk er handtekið og kemur fyrir dómara, þá er búið að yfirheyra það a.mk. einu sinni.“
Aðspurður hvort Pétur Jökull hafi í rauninni gefið sig fram, segir Grímur: „Það er dálítið erfitt að tala um það vegna þess að ég vil ekki gefa of mikla innsýn í starfsaðstæður lögreglunnar, þess vegna hef ég viljað halda mig við að segja að hann var handtekinn á flugvellinum og hann kom sjálfviljugur til landsins.“
Sú spurning er áleitin hvort hlutdeild Péturs Jökuls í stóra kókaínmálinu sé jafnmikil eða meiri en sakborninganna sem dæmdir voru í málinu í fyrra:
„Ég vil ekkert segja um það. Núna erum við bara að rannsaka hans hlut. Auðvitað teljum við okkur hafa upplýsingar, en við erum að rannsaka hans hlut í málinu og þurfum að ræða við hann um það, það er hluti af rannsókninni að átta sig á því hver hans hlutdeild kunni að vera, hvort hún sé einhver og hver hún þá er.“
En hefur Pétur Jökull verið samvinnuþýður í yfirheyrslum? „Um það get ég ekkert sagt,“ segir Grímur og vill gæta þess að gefa ekki of mikið upp um rannsókn málsins.
