Lögreglan á höfuðborgarsvæðinu handtók sextán ára ökumann eftir að hann ók gegn rauðu ljósi í hverfi 110 í gærkvöldi og sinnti ekki stöðvunarmerkjum lögreglu í kjölfarið.
Óhætt er að segja að betur hafi farið en á horfðist þar sem ökumaðurinn ungi jók hraðann til að reyna að komast undan og ók hann bifreiðinni á allt að 150 kílómetra hraða þar sem hámarkshraði, miðað við bestu aðstæður, eru 60 kílómetrar á klukkustund.
Í dagbók lögreglu kemur fram að mikil hálka hafi verið á vettvangi. Að sögn lögreglu var för ökumannsins stöðvuð með því að aka í veg fyrir hann við gott tækifæri og stöðvaði hann bifreiðina áður en til áreksturs kom.
Ökumaðurinn reyndist sem fyrr segir vera 16 ára gamall og eðli málsins samkvæmt því ekki með ökuréttindi. 17 ára farþegi í bifreiðinni hafði einnig ekki öðlast ökuréttindi.
Ökumaðurinn var handtekinn og færður á lögreglustöð enda grunaður um fjöldan allan af umferðarlagabrotum. Forráðamaður var kallaður til sem kom og vitjaði barnsins. Mildi þykir að ekki hafi orðið slys á fólki miðað við vítaverðan akstur ökumannsins.