Þá er komið að annarri netkönnun DV fyrir komandi forsetakosningar þann 1. júní næstkomandi. Í fyrstu könnuninni, í byrjun janúar, var fjölbreyttum lista teflt af fram og var þátttaka framar vonum. Í framhaldinu var ákveðið að allir undir 5% fylgi myndu heltast úr lestinni. Þar á meðal voru kanónur eins og Dagur B. Eggertsson, fyrrverandi borgarstjóri, Magnús Geir Þórðarson, Þjóðleikhússtjóri, Þorgerður Katrín Gunnarsson, formaður Viðreisnar og Ingibjörg Sólrún Gísladóttir, fyrrverandi utanríksráðherra, svo einhverjir séu nefndir.
Þegar hafa fjórir einstaklingar tilkynnt formlega um framboð. Það eru þau Arnar Þór Jónsson, Ástþór Magnússon, Sigríður Hrund Pétursdóttir og Tómas Logi Hallgrímsson. Arnar Þór fékk afar góða kosningu í fyrri könnuninni en aðrir sem máttu vel við una voru Ólafur Jóhann Ólafsson, Katrín Jakobsdóttir, Baldur Þórhallsson, Alma Möller og Sigríður Hagalín Björnsdóttir.
Samkvæmt heimildum DV hafa Ólafur og Baldur þegar hafist handa við að kanna landslagið nánar með skoðanakönnunum og það sama hefur Halla Tómasdóttir, forstjóri og fyrrverandi forsetaframbjóðandi, gert.
Framboðsfrestur rennur út þann 26. apríl næstkomandi og því gæti einhverjar vikur en verið í að formlegt framboð þessara einstaklinga láti á sér kræla. Hér að neðan gefst lesendum tækifæri að hvetja sinn frambjóðanda áfram með atkvæði í netkönnun DV. Að auki var bætt við nýjum nöfnum sem hafa verið í umræðunni.
