Bíleigendur sem lagt hafa bílum sínum í bílakjallaranum við Hamraborg 14-38 í Kópavogi hafa ítrekað orðið fyrir því að undanförnu að bílar þeirra hafa verið skemmdir og í mörgum tilfellum hafa skemmdirnar verið miklar.
Í Hamraborg 14-38 eru bæði fyrirtæki og íbúðir. Einn þeirra sem notar bílakjallarann daglega er Arnar Ingi Jónsson. Hann greindi frá því í gær í Facebook-hópnum Brask og brall að um morguninn hefði hann komið að bíl sínum stórskemmdum, í bílakjallaranum, en búið hafi verið að lemja ítrekað í framrúðuna með hafnarboltakylfu eða sams konar áhaldi og birtir Arnar myndir með færslunni. Eina myndina má sjá hér að ofan og sýnir hún glöggt hversu skemmd rúðan var og væntanlega þarf að skipta henni út.
Í færslunni, sem Arnar veitti DV góðfúslegt leyfi til að fjalla um spyr hann hvort einhverjir aðrir í Kópavogi eða nágrenni hafi lent í svipuðu atviki þessa sömu nótt eða hvort einhverjir hafi séð grunsamlega menn með hafnarboltakylfu eða sams konar áhald.
Í stuttu samtali við fréttamann DV sagði Arnar að hann hefði fengið þó nokkurn fjölda skilaboða og athugasemda frá fólki sem lent hafi í svipuðum atvikum í þessum sama bílakjallara og raunar víðar. Þar af hafi tvö slík atvik átt sér stað í bílakjallaranum á innan við mánuði áður en hans bíll var skemmdur.
Arnar segist til að mynda hafa fengið skilaboð frá konu sem eigi sams konar bíl og hann og hafi lagt bílnum í þessum sama bílakjallara. Afturrúðan á bíl konunnar hafi verið brotin og reynt hafi verið að spenna upp eina hurð á bílnum með kúbeini eða einhverju slíku en engu hafi þó verið stolið.
„Ég er ekki sá fyrsti og örugglega ekki sá síðasti til að lenda í bílarugli í þessum kjallara,“ segir Arnar.
Hann segir að lokum að hann sé að vinna í því að hafa samband við Hamraborgarfélagið sem hefur umsjón með Hamraborg 14-38 og þar á meðal bílakjallaranum, til að athuga meðal annars hvort hægt sé að skoða hvort upptaka hafi náðst á öryggismyndavél af skemmdarverkinu sem framið var á bíl hans.
