„Ég fékk höfnunarbréf í tölvupósti. Ég skil ekkert í þessu,“ sagði tónlistarmaðurinn Svavar Knútur er DV greindi honum frá því að hann hefði hlotið þriggja mánaða starfslaun úr launasjóði tónlistarflytjenda.
Svavar Knútur var ekki búinn að melta þessi mótsagnakenndu tíðindi er DV ræddi við hann. Hann sagðist hins vegar álíta að hann hlyti að hafa fengið starfslaunin af því hann er skráður á lista yfir starfslaunahafa. Höfnunarbréfið hljóti að vera handvömm.
„Ég þarf þá að plana árið upp á nýtt og nú get ég lagt meiri áherslu á tónleikahalda á landsbyggðinni.“ Svavar, sem hefur áður fengið starfslaun í þrjá mánuði, segist sérstaklega hafa nýtt styrkinn til tónleikahalds úti á landi og muni gera það líka að þessu sinni. Sjálfur er hann fluttur til Akureyrar og unir sér vel þar, segir hægari takt þar en í höfuðborginni henta honum og fjölskyldunni betur.
„Maður græðir klukkutíma hér á dag,“ segir hann, alsæll með lífið á Akureyri.
Hann er líka afskaplega ánægður með óvænt gleðitíðindi dagsins enda var hann, af eðlilegum ástæðum, búinn að afskrifa starfslaun þetta árið.
„Þetta er afskaplega gleðilegt og óvænt. Ég er mjög þakklátur fyrir stuðninginn.“
