Tveir stálheppnir miðaeigendur í lottóinu voru með allar tölurnar réttar í útdrættinum um síðustu helgi en potturinn var þrefaldur og innihélt fyrsta vinning upp á tæpar 35 milljónir króna. Skilaði vinningurinn hvorum miðaeiganda rúmum 17,4 skattfrjálsum milljónum.

Í tilkynningu frá íslenskri getspá kemur fram að annar vinningshafinn sé karlmaður sem keypti miðann sinn í Shellskálanum í Austurmörk í Hveragerði.

„Hann heimsótti höfuðstöðvar Íslenskrar getspár snemma á mánudagsmorgun til að skila inn vinningsmiðanum enda hafði sá heppni haft miklar áhyggjur af því hvar öruggast væri að geyma hann eftir að hann hafði áttað sig á stóra vinningnum. Í fyrstu sagði hann að draumurinn væri að geta nú loksins boðið börnunum sínum með sér í ferðalag í aðeins heitara loftslag. Að öðru leyti var allt óákveðið hjá honum enda hefði hann alltaf hugsaði mest um að styrkja við íþróttir í landinu með því að spila í Lottó.“

Hinn vinningshafinn sem var með allar tölur réttar er kona sem keypti sinn miða í gegnum Lottóappið.

„Hún sagðist enn ekki vera farin að trúa þessu, sagðist einfaldlega vera bíða eftir því að vakna og komast að því að þetta væri bara draumur. Hún lýsti því hvernig hún hefði verið hoppandi kát og með öran hjartslátt langt fram eftir laugardagskvöldinu en hún sá það strax í appinu að hún hefði unnið þann stóra. Konan hafði nýverið fest kaup á íbúð og sagði það ólýsanlega tilfinningu að geta nú strax borgað vel inn á lánið sitt,“ segir í tilkynningunni.

Báðum vinningshöfum er óskað innilega til hamingju og þakkar Íslensk getspá um leið kærlega fyrir veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu þar sem þau njóta góðs af allri sölu Lottó.