Franska ríkisstjórnin er fallin eftir að þingið samþykkti tillögu um vantraust nú í kvöld. Þar með er minnihlutastjórn forsætisráðherrans, Michel Barnier, fyrir bý eftir aðeins þriggja mánaða valdatíð.
Vantrauststillagan var borin fram af bandalagi flokka á vinstri væng franskra stjórnmála og naut stuðnings frá öfgahægriflokknum National Rally. Alls samþykktu 331 þingmenn, aukinn meirihluti, tillöguna nú í kvöld og felldu þar með ríkisstjórnina.
Þetta þýðir að Barnier þarf að segja af sér en hann hafði áður varað við því að ef tillagan yrði samþykkt yrði Frakklandi steypt niður í óvissuna og fyrir liggur að forsetinn, Emmanuel Macron, horfist nú í augu við verstu stjórnarkrísu ferils síns.
Enn á eftir að afgreiða fjárlög fyrir næsta ár en ríkissjóður í Frakklandi er rekinn með töluverðum halla. Ekki eru skýrar línur um hvaða stjórn Macron getur komið saman til að taka við af minnihlutastjórn Barnier.
Macron þarf ekki að stíga til hliðar og hefur útilokað að segja af sér, en áköll eftir slíku hafa borist frá báðum vængjum þingsins.
Um er að ræða fyrstu vantrauststillöguna sem er samþykkt á franska þinginu síðan árið 1962. Ekki er hægt að boða til kosninga fyrr en í fyrsta lagi í júlí á næsta ári svo jólin verða Macron líklega erfið enda er þingið klofið í þrjá hópa og enginn þeirra nær að mynda hreinan meirihluta.
