Þrátt fyrir að stýrivextirnir séu í hæstu hæðum, þá hefur ekki tekist á ná stjórn á verðbólgunni og því gæti seðlabankastjórinn, Elvira Nabiullina, neyðst til að hækka þá enn frekar.
Nabiullina hefur nú þegar sætt harðri gagnrýni frá mörgum embættismönnum og olígörkum sem telja að vaxtahækkunarferlið sé til þess fallið að eyðileggja viðskiptalífið í landinu. Ástæðan er auðvitað að hærri vextir þýða hærri fjármagnskostnað, bæði fyrir atvinnulífið og einstaklinga, og geta dregið úr eftirspurn og þar með haldið verðbólgunni niðri.
Vladímír Pútín hefur ítrekað reynt að gera lítið úr þeim erfiðleikum sem efnahagslífið er í en þó bar svo við að á fréttamannafundi rétt fyrir jól viðurkenndi hann að verðbólgan sé í hærri kantinum. Hann reyndi um leið að fullvissa landsmenn um að seðlabankinn og ríkisstjórnin geri allt sem í þeirra valdi stendur til að berja hana niður.
Erlend Bjørtvedt, sem er ráðgjafi hjá greiningarfyrirtækinu Corisk, segir að staða rússneska efnahagslífsins sé mun verri en Rússar vilja sjálfir játa.
„Ný skýrsla frá viðskiptaháskólanum í Stokkhólmi staðfestir það sem við óttuðumst fyrir ári síðan – að rússneskt efnahagslíf sé mjög líklega í frjálsu falli,“ sagði hann í samtali við Norska ríkisútvarpið og bætti við að þetta geti þýtt að Rússland nái þeim punkti að þeir muni eiga í erfiðleikum með að flytja inn vörur, bæði fyrir almenning og í stríðsreksturinn.
„Það er skortur á flutningabílum og bílstjórum. Þá skortir bókstaflega allt,“ sagði hann.
