Bandarískur maður að nafni Chuck Hildebrandt átti að skila bók á bókasafnið í hverfinu sínu fyrir 50 árum. Það gleymdist þangað til í ár þegar Chuck reyndi að skila henni en bókasafnið vildi þá ekki taka við henni.
Chuck Hindebrandt er 63 ára í dag. Fyrir 50 árum síðan, þegar hann var 13 ára gamall, fór hann á bókasafnið í heimabæ sínum Warren í Michigan fylki, skammt frá borginni Detroit, og tók út bókina „Baseball´s Zaniest Stars“, sem fjallaði um rugluðustu stjörnur hafnaboltans. Chuck hafði og hefur enn mikinn áhuga á íþróttinni.
Skömmu seinna flutti fjölskylda hans og þá endaði bókin ofan í kassa með bókunum sem hann átti sjálfur.
„Þegar þú ert að flytja með fullt af bókum þá ertu ekki endilega að skoða hverja einustu. Þú setur þær í kassann og ferð,“ segir Chuck í viðtali við fréttastofuna AP.
Síðan þá hefur Chuck búið víðs vegar um Bandaríkin en nú er hann búsettur í Chicago í Illinois fylki.
„Fyrir fimm eða sex árum síðan var ég að fara í gegnum bækur í bókahillunni minni þegar ég sá að þessi bók var með Dewey flokkunarnúmeri úr bókasafni. Hvað er þetta?“ hugsaði hann.
Inni í bókinni fann hann miða þar sem á stóð að bókin tilheyrði bókasafninu í Warren og að skila ætti henni þann 4. desember árið 1974. Þá ákvað hann að geyma bókina í nokkur ár til viðbótar og skila henni 4. desember 2024, á 50 ára „afmælinu.“ Taldi hann að bókasafnið myndi kannski geta nýtt sér athyglina.
En þegar Chuck mætti til Warren núna í desember með bókina vildi bókasafnsstýran Oksana Urban ekki taka við henni. Chuck mátti eiga hana, og þurfti ekki að borga neina sekt.
„Sumt fólk kemur aldrei til að mæta örlögum sínum,“ sagði Oksana við staðarblaðið Detroit Free Press. „En í hans tilfelli var engum örlögum að mæta því að það var búið að eyða bæði nafninu hans og bókinni út úr kerfinu okkar.“
Sneri Chuck því aftur heim til Chicago með hafnaboltabókina sem hann hafði nappað hálfri öld áður og setti hana aftur upp í hillu. Hann vildi hins vegar láta þetta verða til einhvers góðs og hóf söfnun á hópfjármögnunarsíðunni Gofundme. Þar ákvað hann að safna 4.564 dollurum, eða um 640 þúsund krónum, til styrktar góðgerðasamtaka sem efla lestrarkunnáttu.
Þessi upphæð jafngildir bókasafnssektinni sem hann hefði átt að greiða. Sjálfur gaf hann fyrstu 10 prósentin, eða 457 dollara. Það er skemmst frá því að segja að Chuck er þegar búinn að safna meira en 5 þúsund dollurum.
