Landflótta norðurkóreskir hermenn segja það ekki rétt að landar þeirra, sem hafa verið sendir til að berjast með Rússum í stríðinu í Úkraínu, séu lítt þjálfaði og aðeins fallbyssufóður. Þeir segja hermennina vera úr úrvalssveitum norðurkóreska hersins og séu vel þjálfaðir og eigi umheimurinn ekki að vanmeta þá.

BBC ræddi við þrjá landflótta norðurkóreska hermenn um þetta. Einn þeirra var liðsforingi og sá um þjálfun úrvalssveitanna og segir að það séu þær sem séu komnar Rússum til aðstoðar.

Hann segist sjá merki þess að bæði Úkraínumenn og stuðningsríki þeirra á Vesturlöndum vanmeti norðurkóresku hermennina en það séu mistök að líta á þá sem auðveld skotmörk, einhverskonar „fallbyssufóður“.

Þremenningarnir sögðu að Kim Jong-un, einræðisherra í Norður-Kóreu, sé mjög upptekinn af heiðri og myndi ekki senda illa eða lítt þjálfaða hermenn, sem geta skaðað orðspor landsins, til bandalagsríkis á borð við Rússland.

Sögðu þeir að hann hafi sent þá til Rússlands til að sýna hvers þeir eru megnugir. Þeir sögðu að liðsmenn úrvalssveitanna séu hávöxnustu ungu mennirnir sem gegna herþjónustu og í besta líkamlega forminu. Þeir hlýði einræðisstjórninni í einu og öllu og fygli sérhverri skipun án þess að spyrja einnar einustu spurningar.