Ítalskir miðlar greina frá því að 10 ára pólskur drengur, búsettur á Íslandi, hafi látist í bílslysi í skammt frá Napolí í gær, annan í jólum. Ökukennari olli slysinu og sætir nú lögreglurannsókn.

Slysið átti sér stað þar sem vegur og brautarteinar mætast í bænum Nola, skammt frá Napolí, það er Via Roma, um klukkan 14 í gær, 26. desember.

Gaf í þegar brautarhliðið lækkaði

Verið var að lækka brautarhliðið til þess að hleypa lest fram hjá þegar slysið varð. Ökumaður á Renault bifreið, kona sem er ökukennari og búsett í nágrenninu, kom að. Í stað þess að stöðva gaf hún í til að ná að komast yfir vegamótin áður en hliðið lokaðist alveg.

Hinu megin var fjögurra manna fjölskyldan að ganga yfir götuna. Það er drengurinn ungi sem varð fyrir bílnum, foreldrar hans og 13 ára systir. Að sögn ítalskra miðla eru þau pólsk og búsett á Íslandi en voru í heimsókn hjá ættingjum yfir hátíðirnar.

Konan tók drenginn upp í bílinn og keyrði á spítala en hann var þegar látinn.

Rannsókn hafin

Að sögn ítalskra miðla hefur lögreglustjórinn í Nola, Claudio Russo, þegar ákært konuna fyrir manndráp með ökutæki. Farið hefur verið fram á krufningu á líki drengsins.

Lögreglurannsókn stendur yfir og myndbönd úr myndavélum á staðnum eru könnuð. Fram hefur komið að ljós og bjölluhljóð voru byrjuð til að sýna að loka ætti umferð um veginn fyrir járnbrautarlestinni þegar slysið varð.