Í síðustu viku var rússneski hershöfðinginn Igor Kirillov myrtur ásamt aðstoðarmanni sínum, Ilya Polikarpov. Þar var úkraínska leyniþjónustan að verki. Hafði útsendari hennar komið sprengju fyrir í hlaupahjóli sem var staðsett við anddyri fjölbýlishúss í Moskvu. Sprengjan var síðan sprengd þegar Kirillov og Polikarpov gengu út úr húsinu.

Kirillov var einn hæst setti rússneski hershöfðinginn sem fallið hefur síðan Rússar réðust inn í Úkraínu.

Tilgangurinn með morðinu var að senda skýr skilaboð til Rússa um að enginn sé óhultur fyrir útsendurum úkraínsku leyniþjónustunnar eða sérsveitum úkraínska hersins.

Frá upphafi stríðsins hafa margir valdamiklir og háttsettir Rússar verið myrtir í Rússlandi. Úkraínumenn hafa lýst yfir ábyrgð á sumum morðanna en óljóst er hverjir voru að verki í hinum en grunurinn beinist þó að Úkraínu.

Þann 13. desember síðastliðinn var Mikhail Sjatsky, einn helsti flugskeytasérfræðingur Rússlands, myrtur í Moskvu. Úkraínska leyniþjónustan lýsti yfir ábyrgð á morðinu.

Í október var Nikita Klenkov myrtur nærri Moskvu. Hann var skotinn til bana í bíl sínum. Hann var næstráðandi í einni deild leyniþjónustu hersins, GRU. Hann var nýkominn heim frá Úkraínu.

Í júlí lést Magomed Khandajev, hershöfðingi, skyndilega. Hann var háttsettur í varnarmálaráðuneytinu. Ekki hefur verið skýrt frá dánarorsök hans.

Í júlí missti foringi í GRU báðar fætur þegar sprenging varð í bíl hans í Moskvu. Úkraínumenn segjast ekki vita neitt um málið.

Í desember 2023 var Illya Kyva, úkraínskur stjórnmálamaður í útlegð, myrtur í almenningsgarði í Moskvu. Úkraínska leyniþjónustan lýsti yfir ábyrgð á morðinu. Kyva var stuðningsmaður Rússa.

Í maí 2023 var rithöfundurinn Zakhar Prilepin myrtur þegar sprengja sprakk í bíl hans í Nisjnij Novgorod-héraðinu. Hann var áður andstæðingur Pútíns en eftir að Rússar hernámu Krím, skipti hann um skoðun og studdi Pútín og stríðsrekstur hans í Úkraínu. Úkraínska leyniþjónustan hefur hvorki játað né neitað að hafa komið að morðinu.

Í apríl 2023 var Maksim Fomin, blaðamaður og bloggari, myrtur á kaffihúsi í St. Pétursborg. Honum hafði verið gefin stytta sem búið var að koma sprengju fyrir í. Úkraínumenn neita að hafa verið að verki og Yevgeni Prigozhin, leiðtogi Wagnerhópsins (sem dó sjálfur í dularfullu flugslysi), gaf í skyn að hugsanlega hafi Úkraínumenn ekki verið að verki.

Í ágúst 2022 var Darja Dugina, dóttir öfgaþjóðernissinnans Alexandr Dugin (sem er einn helsti hugmyndafræðingur Pútíns), myrt með bílsprengju í Moskvu. Líklega var sprengjunni ætlað að ganga frá föður hennar. Úkraínumenn neita að hafa verið að verki en bandarískir leyniþjónustumenn segja að þeir hafi verið að verki.

Byggt á umfjöllun Newsweek, Kyiv Independent og Radio Free Europe