Tælenski fréttamiðilinn Pattaya News fullyrðir í frétt á vefsíðu sinni að 71 árs gamall íslenskur karlmaður sé í haldi lögreglu þar ytra eftir lík 48 ára konu fannst í íbúð sem maðurinn leigir í borginni. Kemur fram í frétt miðilsins að konan virðist hafa legið látinn í þrjá sólarhringa í íbúð mannsins á fimmtu hæð gistiheimilis við Soi Somprasong-torg í borginni,  áður en hún uppgötvaðist.

Maðurinn, sem er nefndur „Mr. E“, í greininni er sagður hafa gefið þær útskýringar að hann hafi ekki áttað sig á að konan væri látin.

Það virðist hins vegar orðið sífellt algengara að tælenskir fjölmiðlar ruglist á Írlandi og Íslandi þegar kemur að fréttum þar ytra. Svo virðist vera að slíkur misskilningur hafi átt sér stað í þetta skiptið en aðrir tælenskir miðlar segja sitt á hvað hvort maðurinn sé íslenskur eða írskur.

Þannig greindi Vísir frá því í ágúst á þessu ári að drukkinn íslenskur maður hefði gengið berserksgang ytra og lamið leigubílstjóra. Sú frétt var hins vegar dreginn tilbaka stuttu síðar þegar áðurnefndur tælenskur fréttamiðill, Pattaya News, staðfesti að maðurinn væri írskur.

Í samtali við Ægi Þór Eysteinsson, fjölmiðlafulltrúa utanríkisráðuneytisins, hefur fyrrnefnt mál ekki komið inn á borð þeirra. Þá hefur málið vakið umtal innan Facebook-hóps Tælandsvina en þar kannast ekki nokkur maður við „Mr. E“ sem þar af leiðandi er vonandi írskur.

Uppfært: 

Daily Mail hefur nú birt ítarlega umfjöllun um málið þar sem fram kemur að maðurinn, sem heitir heitir Bearach Beataid, sé Norður-Íri en sé einnig með írskt vegabréf. Hin látna starfaði sem kynlífsverkakona og hét Duangta Khampongsom.