Laukar, kartöflur, engifer og bananar eru dæmi um matvæli sem þú átt ekki að geyma í ísskáp og geta hreinlega skemmst ef sá geymslustaður er valinn.

Daily Mail fjallaði um málið í vikunni og vísaði í ráðleggingar indverska næringafræðinginn Jhanvi Sanghvi.

Sú sagði að rakin í hefðbundnum laukum gerði það að verkum að þar væri kjöraðstæður fyrir myglusveppagró að dafna. Það sama gildir um hvítlauk sem hreinlega skemmist hraðar í ísskápnum. Lauk og hvítlauk ætti því frekar að geyma á þurrum, dimmum og köldum stað.

Einnig ætti að forðast að geyma kartöflur í ísskáp.

Í fyrsta lagi hefur það áhrif á bragðið. Kuldinn gerir að verkum að sterkjan sem er í kartöflunum umbreytist hraðar í sykur sem hefur áhrif á bragðið. Á sama tíma molnar hún og mjölið verður meira áberandi þegar kemur að bragðinu og áferðinni.

Sanghvi heldur því einnig fram að það að geyma kartöflur í ísskáp geti hreinlega reynst hættulegt. Þegar sterkjan umbreytist í sykur þá verða ákveðin efnahvörf sem geta haft skaðleg áhrif þegar kartöflurnar eru eldaðar að hennar sögn. Efnasambandið sem myndast kallast Acrylamide og er talið krabbameinsvaldandi. Rétt er að geta þess þó að fræðimenn eru ekki allir sannfærðir um þessa kenningu.

Þá ættu bananar ekki að koma nálægt ísskápnum því ávöxturinn ljúffengi skemmist hratt í þeim aðstæðum. Það sama gildir um engiferrót, kuldinn þurrkar upp rótina og gerir það að verkum að ferskleiki hennar og bragð tapast.