Það er í sjálfu sér ekki óvenjulegt að hershöfðingjar, sem taka þátt í stríði, falli í valinn. Í gær var röðin komin að rússneska hershöfðingjanum Igor Kirillov að kveðja þennan heim en það hefur vakið mikla athygli hvernig dauða hans bar að.

Hann var myrtur í Moskvu með sprengju sem var falin í rafhlaupahjóli.

Úkraínumenn sprengdu rússneskan hershöfðingja í loft upp í Moskvu – Földu sprengjuna í rafhlaupahjóli

Kirillov er mikilvægasti rússneski hershöfðinginn sem hefur fallið í átökunum við Úkraínumenn. Eitt er ef hann hefði fallið í fremstu víglínu eða á herteknu svæðunum í Úkraínu en hann endaði daga sína í Moskvu og er málið algjör niðurlæging fyrir Vladímír Pútín, forseta.

Kirillov hafði komist til metorða í hernum og stóð ofarlega í valdapýramídanum. Dauði hans sýnir að enginn er öruggur, meira að segja ekki í Moskvu.

Rússar saka Úkraínumenn um morðið og heimildarmenn innan leyniþjónustu úkraínska hersins segja að leyniþjónustan hafi staðið á bak við morðið.

Úkraínumenn segja að Kirillov hafi verið lögmætt skotmark þar sem hann var hershöfðingi og hafi verið yfirmaður kjarna- og geislavopnadeildar hersins.