Tveir menn brutust inn í hús í Grafarholti á miðvikudagsmorguninn í síðustu viku og höfðu á brott með sér mikið af verðmætum. Eigandi hússins, þar sem innbrotið var framið, Jón Björn Eysteinsson, segist hafa mikið af gögnum úr myndeftirlitskerfi sem hann hefur sent lögreglu.

„Þetta er einbýlishús og ég er með íbúð niðri sem er lokuð frá húsinu. Þar er stór horngluggi, þeir krækja einhvern veginn í öryggislæsinguna og ná að opna til hálfs og komast inn,“ segir Jón Björn í viðtali við DV.

Innbrotsþjófarnir tveir höfðu á brott með sér tölvur, sjónvörp, fatnað og fleira. „Það er strákur sem ég leigi íbúðina og býr þarna. Hann tapar þarna miklu af vinnugögnum emð tölvunni.“

Innbrotið var framið á milli 1o og 11 á miðvikudagsmorguninn í síðustu viku en uppgötvaðist ekki fyrr en á föstudagskvöldið. „Hann kemur ekki heim, strákurinn, fyrr en á föstudagskvöld og þá hafa liðið tveir sólarhringar. Í rauninni fór ég bara í lögregluna í gær. Ég er með allt nema bílnúmerið í eftirlitsmyndavélinni, en hann er auðþekkjanlegur, þetta er Audi Station árgerð 2005 til 2008.“

Jón Björn segir mennina líta út fyrir að vera um fertugt en hann áttar sig ekki á þjóðerni þeirra. Hann er dálítið hissa á að lögregla hafi ekki haft samband við hann en hann sendi lögreglunni gögn í gær.

„Þessum gæjum er skítasama þó að þeir séu fyrir framan myndavél allan tímann. Þeir skanna hverfið og sjá þarna álitlegan glugga, ég held að það sé málið. Það er gott að fólki í hverfinu átti sig á alvarleika málsins, fólk gangi vel frá sínu og fylgist með sínum eignum,“ segir Jón Björn.

Þeir sem kynnu að hafa upplýsingar um málið, t.d. um ferðir svarta Audi bílsins, eru beðnir um að hafa samband við lögregluna á höfuðborgarsvæðinu eða við Jón Björn sjálfan, í gegnum Facebook-síðu hans.