Bashar al-Assad, fyrrverandi einræðisherra Sýrlands, hefur loks tjáð sig um atburðina sem leiddu til þess að hann ákvað í skyndi að yfirgefa Sýrland og leita hælis í Rússlandi.

Uppreisnarhópurinn Hayat Tahrir al-Sham náði völdum í Sýrlandi og ákvað Assad að flýja land sunnudaginn 8. desember. Óhætt er að segja að brotthvarf hans marki þáttaskil í sögu Sýrlands þar sem Assad-fjölskyldan hefur verið við völd frá árinu 1970.

Assad birti yfirlýsingu á Telegram-síðu sinni í dag þar sem hann segist aldrei hafa ætlað sér að flýja land eða segja af sér sem forseti landsins. Hann hafi dvalið í höfuðborginni Damaskus allt þar til á síðustu stundu.

„Ekki á neinum tímapunkti var markmiðið að stíga til hliðar eða leita skjóls í öðru landi. Eina markmiðið var að halda baráttunni áfram gegn hryðjuverkamönnunum,“ segir hann.

Assad segist hafa yfirgefið forsetahöllina að morgni sunnudagsins 8. desember og haldið til Hmeimim-herstöðvar Rússa skammt frá borginni Latakia. Á þessum tímapunkti var ljóst, að sögn Assads, að uppreisnarmenn væru við það að ná völdum í Damaskus.

Hann segir að þegar árásir voru gerðar á Hmeimim-herstöð Rússa hafi yfirvöld í Moskvu skipað honum að yfirgefa svæðið og þar með Sýrland.

Í yfirlýsingu sinni málaði Assad sig upp sem traustan leiðtoga og fjölskyldumann sem ávallt hefði haft hagsmuni sýrlensku þjóðarinnar að leiðarljósi. Ekki er víst að allir taki undir þetta enda hefur Assad haft orð á sér að hafa verið einn alræmdasti einræðisherra heims meðan hann ríkti.