Óhætt er að segja að yfirvöld, sem og almenningur, í Bandaríkjunum og Bretlandi séu uggandi yfir dularfullum flygildum sem sést hafa á sveimi síðustu misseri. Enginn veit á þessari stundu hver uppruni þeirra er en yfirvöld hafa viðurkennt tilvist þeirra og segja að allt verði gert til þess að komast til botns í ráðgátunni.

Á samfélagsmiðlum hefur mikil umræða verið um málið og sérstaklega eru áhugamenn um fljúgandi furðuhluti á tánum og telja miklar líkur á því að fyrirbærin séu ekki þessa heims.

Daily Mail sló málinu upp á forsíðu sinni í morgun. Í umfjölluninni kemur fram að flygildanna varð vart yfir New Jersey um miðjan nóvembermánuð en síðan hefur tilkynningum um slíkt fjölgað í Bandaríkjum og Bretlandi. Bandaríski herinn viðurkenndi til að mynda á dögunum að óskilgreind flygildi hefðu sést yfir nokkrum herstöðvum Bandaríkjamanna á Bretlandseyjum.

Ætla mætti að auðvelt væri fyrir að yfirvöld að komast að hinu sanna en umrædd flygildi virðast vera að einhverri háþróaðri gerð. Þannig vakti það mikla athygli þegar lögregluyfirvöld í New Jersey greindu frá því að þau hefðu sent dróna á loft til móts við ókunnug flygildi en sá hafi ekki átt roð í tækin sem stungu drónanna gjörsamlega af. Um var að ræða viðbragð við tilkynningu þess efnis að á fimmta tug flygilda hefðu komið fljúgandi utan af hafi.

En þó að samsæriskenningasmiðir séu á því að um geimverur sé að ræða þá eru margit á þeirri skoðun að fjandmenn Vesturlanda, til að mynda Rússar eða Íranir beri ábyrgð á flygildunum. Þannig beinist áhugi þeirra að stórum hlut að herstöðvum Bandaríkjamanna, sér í lagi þeim sem orðrómur er um að geymi kjarnavopn. Telja margir að um sé að ræða rússneska dróna af gerðinni Orlan-10 sem yfirleitt er flogið saman í hóp, 3-5 tæki í hvert skipti.

Hvort að einhverskonar árás sé yfirvofandi skal ósagt látið en sérfræðingar sem Daily Mail vitnar í telja að um sé að ræða nýjasta uppátæki Vladimir Pútín, Rússlandsforseta, til þess að sá fræjum efasemda og ótta í Vesturlöndum. Flygildin dularfullu koma í kjölfar netárása, skemmdarverka á innviðum og innistæðulausum sprengjuhótunum sem leiddu af sér usla á breskum flugvöllum á dögunum.

Markmiðið með flygildinum sé að valda usla, safna upplýsingum og mæla viðbragðstíma loftvarna hjá bandarískum og breskum yfirvöldum.

En á meðan fjölgar tilkynningunum um slík flygildi og margar kenningar eru enn á lofti. Þannig fullyrti bandaríski öldungardeildarþingmaðurinn Jeff van Drew við blaðamenn á dögunum að um íranska dróna væri að ræða og þeir kæmu fljúgandi frá móðurskipi sem lúrði langt utan bandarískrar lögsögu.