Hann var að vonum glaður tæplega níræði maðurinn sem vann 70 skattfrjálsar milljónir króna í Milljónaveltunni í Happdrætti Háskóla Íslands þegar dregið var í kvöld. Vinningshafinn hefur átt miða í Happdrættinu alla ævi en móðir hans keypti miða þegar hann fæddist, tveimur árum eftir stofnun Happdrættisins. Allar götur síðan hefur hann átt þann miða auk annarra. Í gegnum tíðina hefur hann unnið fjölda vinninga en þetta er án efa langstærsti vinningurinn.
Fyrsti vinningurinn í Aðalútdrættinum, 7 milljónir króna, féll á trompmiða og því fimmfaldaðist vinningsupphæðin og endaði í 35 milljónum króna. Miðaeigandinn ætlaði ekki að trúa eigin eyrum þegar hann fékk símtal frá Happdrættinu þar sem honum var tilkynnt um vinninginn. Það má með sanni segja að vinningurinn komi sér vel enda um fimm manna fjölskyldu með unga tvíbura og leikskólabarn að ræða. Miðaeigandinn sagði að það munaði svo sannarlega um 35 skattfrjálsar milljónir fyrir unga fjölskyldu sem væri að koma undir sig fótunum.
Í tilkynningu segir að útdráttur kvöldsins sé skemmtilegur lokahnykkur á 90 ára afmælisári Happdrættis Háskóla Íslands. Á árinu hafa 48.926 manns skipt á milli sín alls 1.914.655.000 kr. Fyrir utan vinningshafa kvöldsins þá vann einn miðaeigandi 50 milljónir króna í maí, 12 miðaeigendur fengu sjö skattfrjálsar milljónir hver árið 2024 og átta vinningshafar fengu 2,5 milljón króna hver. Að lokum hafa hvorki meira né minna en 180 einstaklingar fengið eina milljón króna í vinning í Happdrætti Háskólans á afmælisárinu.
Happdrætti Háskólans óskar vinningshöfum innilega til hamingju og þakkar öllum miðaeigendum stuðninginn síðastliðin 90 ár. Með kaupum á miða í Happdrætti Háskólans stuðla miðaeigendur að áframhaldandi uppbyggingu Háskóla Íslands og tryggja Íslendingum blómlegt háskólasamfélag. Allur hagnaður af rekstri HHÍ fer í uppbyggingu Háskóla Íslands og hefur Happdrættið fjármagnað nær allar byggingar og tækjakost Háskólans frá stofnun þess.
