Hannes gerir þetta að umtalsefni á Facebook-síðu sinni og nefnir afstöðu Íslands í málefnum Ísraels og Rússlands sem dæmi. Setur hann spurningarmerki við ýmsar ákvarðanir að undanförnu.
„Ég hef átt ágæt samskipti við utanríkisráðherrann, sem er mjög frambærileg og þekkileg, en ég veit ekki, á hvaða ferðalagi hún er þessi misserin. Hvers vegna lokuðum við ein Norðurlandaþjóða sendiráði í Moskvu? Hvers vegna fór Ísland ekki að dæmi margra annarra Evrópuþjóða og svaraði engu um hina fráleitu handtökuskipun á hendur forsætisráðherra Ísraels? Hvers vegna heldur ráðherrann áfram að ráðast á Ísrael, sem er að reyna að uppræta hryðjuverkasamtök?”
Þórdís Kolbrún tjáði sig meðal annars í gær um nýja skýrslu Amnesty um stríðið á Gaza. Í viðtali við RÚV sagði hún stríðið á Gaza óréttlætanlegt og ekki í samræmi við alþjóðalög. Þá tjáði hún sig í síðustu viku um handtökuskipun Alþjóðlega sakamáladómstólsins í Haag gagnvart Benjamín Netanjahú, forsætisráðherra Ísraels og Yoav Gallant, fyrrverandi varnarmálaráðherra landsins.
Sagði Þórdís Kolbrún við það tilefni í fréttum RÚV að íslensk stjórnvöld virði sjálfstæði og ákvarðanir dómstólsins. Áður höfðu til dæmis Bandaríkjamenn, auk fleiri þjóða, gagnrýnt handtökuskipunina harðlega og hafnað henni.
Hannes Hólmsteinn segir að utanríkisstefna Íslands eigi að vera einföld: Selja fisk og tryggja varnir.
„Við eigum að selja öllum fisk, líka Rússum og Kínverjum (þótt mér geðjist ekki að valdsmönnum þar), og hinir einu, sem geta tryggt varnir okkar, eru Bandaríkjamenn, og þess vegna eigum við að taka okkur stöðu við hlið þeirra. Virðing smáþjóða á alþjóðavettvangi stendur í öfugu hlutfalli við mælgi þeirra, sagði Bjarni Benediktsson eldri. Það er Íslendingum um megn að frelsa heiminn. Þeir eiga að halda sér til hlés eins og Svisslendingar, hyggnasta þjóð Evrópu.“
