Egill er þeirrar skoðunar að deilur um Evrópu yrði bæði erfiðar og tímafrekar og betra væri að einbeita sér að heilbrigðis-, velferðar- og húsnæðismálum þar sem skóinn kreppir verulega.
„Háleit markmið eru góð, en þau mega ekki vera of mörg og flókin – það er lærdómur frá Jóhönnustjórninni um árið,“ segir hann.
Fjölmargir leggja orð í belg við færslu Egils og virðast sumir hjartanlega sammála honum á meðan aðrir eru ekki svo vissir.
„Tveir af þessum flokkum hafa verið fylgjandi aðild að EU og einn virðist ekki hafa mótaða stefnu um málið. Í því ljósi væri það mjög órökrétt að láta ekki reyna á málið. Ekki víst að þessir flokkar fái betra tækifæri til þess en einmitt núna,“ segir Björn Valur Gíslason, fyrrverandi þingmaður VG, til dæmis um málið.
Egill svarar Birni og bendir á að staðan í Evrópu sé ekki burðug um þessar mundir.
„Það er ekkert tækifæri núna, með pólitík í uppnámi í bæði Frakklandi og Þýskalandi, pópúlíska flokka við stjórn í ýmsum Evrópulöndum, talsverða efnahagslega stöðnun í álfunni og stríð nálægt landamærum ESB. Ekki nokkur leið að selja kjósendum þetta,“ segir Egill.
Einn spyr hvort þessi rök Egils geti þá ekki allt eins gilt um allt. „Er það ekki alltaf ástæða til þess að ræða ekki Evrópumál ef út í það er farið. Það verða alltaf áskoranir sem þarf að takast á við,“ spyr viðkomandi.
Egill svarar að með ríkjandi ástandi eigi hann við aðild að EES og Schengen.
„ESB aðild hefur í raun aldrei verið raunhæfur kostur á Íslandi – meira að segja á tíma Jóhönnustjórnarinnar var þetta vonlaust dæmi. Óseljanlegt. Og eins og ég hef sagt áður, Ísland fer ekki inn nema Noregur geri það. ESB umsókn myndi stúta þessari ríkisstjórn – ef hún kemst á koppinn,“ segir hann.
