Donald Trump flutti lokaræðu sína fyrir forsetakosningarnar í Bandaríkjunum í dag á fundi með stuðningsmönnum sínum í Pittsburgh í Pennsylvaníu í gærkvöld.
Trump viðhélt fjandsamlegri orðræðu sinni í garð innflytjenda og sagði Bandaríkin vera „hernumið land“ (e. occupied country) og vísaði þar bæði til löglegra og ólöglegra innflytjenda. Hét hann því að „frelsa hverja borg og hvern bæ sem hefur orðið fyrir innrás og verið sigruð“.
Trump gerði lítinn greinarmun á óskráðum farandverkamönnum sem hann sagði hafa lagt undir sig íbúðakjarna í Colorado og þúsundum innflytjenda frá Haíti sem komu löglega til landsins og búa í Springfield Ohio.
„Þetta eru herinnrásir án einkennisbúninga. Það er það eina sem þetta er,“ sagði Trump og hét stórfelldum brottflutningi innflytjenda frá landinu.
Trump sagði að óskráðir innflytjendur hefðu myrt Bandaríkjamenn og hét því að stuðla að því að allir innflytjendur sem myrtu bandaríska borgara fengju dauðarefsingu.
Hann hét því jafnframt að blása lífi í bandaríska iðnaðarframleiðslu með háum tollum á innfluttar bílavörur frá Mexíkó og stál frá Kína, en hagfræðingar hafa sagt að þessi áform séu verðbólguhvetjandi.
Trump hefur ávallt haldið því fram að kosningasvindl hafi átt sér stað er hann tapaði fyrir Joe Biden árið 2020. Hann sagðist í gærkvöld telja að munurinn núna yrði svo mikill að það væri ekki hægt að stela kosningunum.
„Fjögur ár af Kamölu hafa ekki skilað neinu nema efnahagslegu helvíti fyrir bandarískan verkalýð,“ sagði Trump.
Sjá nánar á vef CNN.
