Elliði lýsir þessari skoðun sinni í aðsendri grein á vef Vísis, en frasinn sem hann vísar til er þessi: „Þetta gerðist á ykkar vakt.“
„Þetta heyrist í hvert einasta skipti sem bent er á að staðan í stórum málaflokkum sé óviðunandi. Þetta er samt kjaftæði,“ segir Elliði og bætir við að þessu sé hent fram í umræðu um stöðu mála hvað varðar hælisleitendur og þegar fjallað er um ríkisútgjöld.
„Alltaf kemur sama svarið: „Þetta gerðist á ykkar vakt“. Innviðafjárfestingar, lestrarkennslan og orkumálin. Allt á að hafa orðið lakara á okkar vakt. Húsnæðismálin, matarverðið, verðbólgan, ruglið og bullið, alltaf er vísað í „okkar vakt“.“
Elliði dregur ekki fjöður yfir það að eitt sinn hafi Sjálfstæðisflokkurinn verið stjórnandi á vaktinni – skipstjórinn sem tók ákvarðanir sem leiddu þjóðina til þeirrar velmegunar sem eftir er tekið úti í heimi.
„Hann hefur setið í 22 af 31 ríkisstjórn sem mynduð hefur verið frá stofnun hans. Hann fékk umboð þjóðarinnar til leiða í jörðu stækkun landhelginnar, rafvæðingu landsins, aukið viðskiptafrelsi, þátttöku í Nató, viðbrögðin við óðaverðbólgunni og svo margt annað.“
Hann segir í pistli sínum að á seinustu árum hafi þó orðið breyting.
„Við lok seinustu aldar dansaði fylgið oft um og yfir 40% Í kosningum 2016 fengum við Sjálfstæðismenn 29% atkvæða og 21 þingmann kjörinn. Umboðið var áfram skýrt, þjóðin vildi hafa Sjálfstæðisflokkinn í ríkisstjórn. Hún vildi að hann bæri ábyrgðina, færi með stjórnina á vaktinni.“
Elliði bendir svo á að í kosningunum 2017 hafi fylgið verið 24,4%.
„Sjálfstæðisflokkurinn var enn á vaktinni, en í stað þess að gegna hlutverki skipstjóra var hann nú orðinn bátsmaður. Hann stjórnaði ekki lengur veiðiferðinni. Pólitískt vægi hafði minnkað verulega og þar með stjórnunin á skipinu. Stefnumálin náðu því síður fram að ganga enda það eðlilegt þegar unnið er með flokkum sem hafa gjörólíka stefnu í lykilmálaflokkum.“
Elliði segir að það megi vel vera að það hafi verið mistök að standa vaktina með vinstriflokkunum jafn lengi og raunin varð.
„Ef til vill væri staðan í fylgiskönnunum önnur ef Sjálfstæðisflokkurinn hefði skráð sig af vaktinni og neitað ábyrgð. Svo mikið er víst að staðan í stærstu málaflokkum væri önnur og betri ef Sjálfstæðisflokkurinn hefði áfram farið með stjórnina á vaktinni,“ segir hann.
Elliði nefnir svo að lokum að þeir sem sárast kvarta yfir því að Sjálfstæðisflokkurinn hafi ekki náð stefnumálum sínum fram á yfirstandandi kjörtímabili fái núna möguleika á að gera bragarbót þar á.
„Það er bara ein leið til að tryggja þær áherslur sem kvartað er undan með frasanum „Þetta gerðist á ykkar vakt. Það er að tryggja Sjálfstæðisflokknum nægilega gott kjör til að hann fari með vaktformennsku. Að hann sé í hlutverki skipstjóra, ekki bátsmanns. Þannig – og bara þannig – verður hann ábyrgur fyrir vaktinni.
