Yfirkjörstjórn í Norðausturkjördæmi er reiðubúin að óska eftir að kjörfundur standi til sunnudags ef veður verða þannig á laugardag að kjósendur komist illa á kjörstað. Ef það myndi gerast yrðu atkvæði ekki talin fyrr en á sunnudagskvöld.

Austurfrétt greinir frá þessu.

Eins og greint var frá í gær er útlit fyrir slæmt veður um allt land en sérstaklega á norðanverðu landinu. Úrkomu í formi snjókomu eða slyddu og hvassri norðaustanátt. Upphaflega var talið að veðrið yrði hvað verst á Ströndum og norðanverðum Tröllaskaga en nú lítur út fyrir að veðrið verði hvað verst á norðaustanverðu landinu og gangi ekki niður fyrr en á sunnudagsmorgun.

Yfirkjörstjórn fylgist náið með veðurspám og undirbýr viðbragð ef að þær verstu raungerast. Landskjörstjórn tekur hins vegar endanlega ákvörðun um framkvæmdina.

Í Norðausturkjördæmi er talið á Akureyri, en heimild er til þess að kjósa á tveimur öðrum stöðum ef svo ber undir. Aldrei hefur reynt á þetta. Hingað til hafa kjörgögn verið flutt til Akureyrar alls staðar af kjördæminu, svo sem frá Grímsey, Tröllaskaga, Langanesi og Austfjörðum.

Ekki má byrja að telja atkvæði fyrr en kjörfundi er lokið. Verði kjörfundur framlengdur til sunnudags er ljóst að ekki verður af kosningavöku á laugardagskvöld.