Héraðssaksóknari hefur ákært tvítuga konu í Hafnafirði fyrir árás sem konan framdi árið 2022, þegar hún var á átjánda ári.

Konan er ákærð fyrir stórfellda líkamsárás á aðra konu innandyra í íbúð með ónefndu heimilisfangi. Hún er sögð hafa veist að konunni með því að hrinda henni og taka með báðum höndum í úlpu brotaþolans og ýta henni ítrekað að útidyrahurðinni. Síðar er brotaþoli var sest í sófa inni í herbergi togaði ákærða í fætur hennar þannig að hún datt úr sófanum og lenti á rassinum. Því næst er hún sögð hafa dregið hana um íbúðina og reynt að skella höfði hennar í vegg í stofunni. Síðan segir í ákæru:

„Í framhaldinu fór A aftur inn í herbergi og settist í sófa en þá kom ákærða til hennar og ýtti höfði hennar aftur á bak þannig að það rakst í gluggakistuna og í framhaldinu reif ákærða í hár A og barði höfði hennar ítrekað í gluggakistuna. Loks veittist ákærða enn frekar að A inni í íbúðinni með því að grípa í hár hennar og axlir og slá henni utan í veggi og hurðar. Afleiðingar árásarinnar voru þær að A hlaut klórför í hársverði og á hálsi, 3-4 kúlur í höfuðleðri, aðallega í hnakka, eymsli yfir vinstra kinnbeini og vinstri neðri kjálka og kjálkalið, eymsli í hnakkavöðvafestum og vöðvum hálshryggjar og skerta hreyfigetu um hálshrygg vegna stífleika, eymsli neðanvert yfir mjóbaki, eymsli á vinstri lærlegg, gat á hljóðhimnu hægra megin, áberandi minnkaðan kraft í vinstri fæti og minnkað snertiskyn í vinstri fæti (helftarlömun), mar á utanverðum hægri framhandlegg, klórför og skrámur á hægra handarbaki, bólgu og eymsli á dálkshnyðju, tognun og ofreynslu á axlarlið, lendarhrygg, mjaðmagrind, ökkla, hálshrygg og hné, auk ógleði og heilahristings. Hefur varanlegur miski A vegna árásarinnar verið metinn 35 stig og varanleg örorka 40%.“

Héraðssaksóknari krefst þess að konan verði dæmd til refsingar og greiðslu alls sakarkostnaðar. Fyrir hönd brotaþola er farið fram á miskabætur að fjárhæð fimm milljónir króna.

Málið verður þingfest í Héraðsdómi Reykjaness á miðvikudaginn.