Í nýju kosningamyndbandi á samfélagsmiðlum leitast Píratar við að koma femínisma betur á kortið í yfirstandandi kosningabaráttu fyrir alþingiskosningarnar á laugardaginn. Þar varar flokkurinn við því að karlmenn sem vilji skerða yfirráð kvenna yfir eigin líkama komist til valda en þó fer einna mest fyrir Ingu Sæland formanni Flokks fólksins í myndbandinu en hún er augljóslega ekki karlmaður.
Er í myndbandinu vísað til umræðu sem fram fór á Alþingi þegar ný lög um þungunarrof voru samþykkt árið 2019 en þá var sá tími sem konur geta óskað eftir þungunarrofi lengdur úr 16. viku meðgöngu í 22. viku.
Myndbandið var birt á Facebook-síðu Pírata fyrir sex dögum en flokkurinn keypti auglýsingu á samfélagsmiðlinum sem er í formi þessa myndbands.
Myndbandið hefst á því að Þórhildur Sunna Ævarssdóttir þingflokksformaður Pírata horfir nokkuð ábúðarfull framan í myndavélina og spyr:
„Skiptir femínismi einhverju máli í þessari kosningabaráttu?“
Þá er klippt á umræður úr þinginu sem bersýnilega snúast um þessi fimm ára gömlu lög. Sjá má myndskeið af Ingu Sæland fara mikinn í ræðustól en hún var mjög andsnúin frumvarpinu. Í myndskeiðinu segir hún:
„Það er markmiðið að þetta verði gert og það hefur þessi salur sannarlega sýnt með frábærum húrrahrópum og gleðihljóðum. Þegar við ætlum að taka hér akvörðun um það að 22 vikna gamalt ófullburða barn verði drepið í móðurkviði. Ég mun alltaf segja nei.“
Þegar þessu myndskeiði af fimm ára gamalli ræðu Ingu Sæland lýkur tekur Þórhildur Sunna aftur við:
„Já, ég myndi segja að femínismi skipti heilmiklu máli í þessari kosningabaráttu. Það eru akkúrat núna flokkar, mjög vinsælir flokkar, sem að bara fyrir fimm árum síðan vildu taka réttinn af konum til að hafa yfirráð yfir sínum eigin líkama og það er ekki lengra síðan en það.“
Á meðan Þórhildur Sunna mælir þessi orð birtast á skjánum myndir af Ingu Sæland, Bjarna Benediktssyni formanni Sjálfstæðisflokksins og Sigmundi Davíð Gunnlaugssyni formanni Miðflokksins en öll greiddu þau atkvæði gegn þessu frumvarpi sem rýmkaði rétt kvenna til þungunarrofs. Er vart hægt að skilja orð Þórhildar Sunnu öðruvísi en að þessir flokksleiðtogar vilji alfarið banna konum á Íslandi að fara í þungunarrof.
Í pallborðinu á Vísi fyrir um þremur vikum sagði Bjarni að hann vildi alls ekki banna konum að fara í þungunarrof en hann teldi að það ætti að veita leyfi til að rjúfa meðgöngu í seinasta lagi í 20. viku meðgöngu en 22 vikur væri of mikið. Sigmundur Davíð tók í sama streng, að rjúfa meðgöngu þetta seint væri of langt gengið en hann vildi ekki banna konum að fara í þungunarrof.
Fauk í Bjarna í gær þegar talið barst að umdeildu málefni – „Hvers konar spurning er þetta?“
Af ræðu Ingu sem hún flutti við umræður um þungunarrofsfrumvarpið, sem varð að lögum árið 2019, sést að hún er bersýnilega ekki hrifin af þungunarrofi og henni fannst of mikið að setja hámarkið við 22. viku meðgöngu en hún vildi þó ekki banna þungunarrof alfarið.
Í myndbandi Pírata heldur Þórhildur Sunna áfram að vara við þeim sem vilji taka réttinn af konum til að hafa yfirráð yfir eigin líkama, þó einkum karlmönnum:
„Þannig að femínismi skiptir ótrúlega miklu máli vegna þess að það gæti gerst í þessum kosningum að það komist hér menn og þetta eru aðallega menn til valda sem vilja taka af þér valdið til að hafa stjórn yfir þínum eigin líkama og hvort þú getir eignast börn og hvenær.“
Ekkert er minnst á þungunarrof í stefnuskrá þeirra flokka sem Inga, Bjarni og Sigmundur Davíð leiða og virðist vera aðaltilgangur myndbandsins að vara við.
Einn áhorfandi spyr í athugasemdum við myndbandið hvers vegna verið sé að vara sérstaklega við karlmönnum sem vilji skerða réttindi kvenna en samt farin sú leið að birta myndbrit af ræðu konunnar Ingu Sæland. Svarið sem hann fær er:
„Ræðan hennar Ingu var sérstaklega rosaleg. Það er nú bara þess vegna.“
Áhorfandinn segist sammála því að þessi bútur úr ræðu Ingu einkennist af dómhörku en það breyti þó ekki einu:
„Hún er ekki karlmaður.“
Myndband Pírata þar sem varað er við karlmönnum, sem vilji skerða réttindi kvenna, með myndbroti af Ingu Sæland er hér fyrir neðan:
