Skoðanakannanir birtast nú ört og sýna fylgi flokkanna á mikilli hreyfingu. Einn daginn eru Píratar úti af þingi, annan daginn Vinstri græn og þann þriðja gamli gróni Framsóknarflokkurinn. Samfylking og Viðreisn skiptast á að hafa mesta fylgið.

En hversu mikið er að marka þessar kannanir. Fjölmiðlamaðurinn Egill Helgason hefur sínar efasemdir um það.

„Segi eins og er, hef talsverðar efasemdir um skoðanakannanir sem eru að birtast þessa dagana,“ segir hann í stuttri færslu á samfélagsmiðlum. „Menn ættu að varast að draga of miklar ályktanir af þeim – gæti reynst vera tal út í bláinn, samkvæmisleikur í besta falli.“

Taka margir undir með honum. Kannanirnar, sem koma flestar frá Gallup, Maskínu og Prósent, séu út og suður. Minni jafn vel á „skagfirsku sveifluna,“ eins og fjölmiðlamaðurinn og frambjóðandi Samfylkingarinnar, Sigmundur Ernir Rúnarsson, nefnir.

Annar frambjóðandi, Alexandra Briem Pírati, segir að það sé ekki gott fyrir andlega ró sína að fylgja þeim of náið eftir.

Enn annar fjölmiðlamaður, Bergljót Davíðsdóttir, nefnir hins vegar að eftir því sem nær dregur séu kannanir mjög nærri niðurstöðunum.

„Við vitum að SJálfstæðisflokkur fær alltaf aðeins meira en kannanir segja. Hins vegar þarf svo lítið til að breyta vonum þeirra sem eru í kringum 5 prósentin. Sen nota bene er vanvirðing við þá sem kjósa þá flokka til að freista þess að koma góðu fólki á þing,“ segir hún. Bráðnauðsynlegt sé að breyta kosningalöggjöfinni fyrir næstu kosningar.