Þórhallur sagði frá því á Facebook í gær að hann hefði sent Íslandsbanka bréf og óskað eftir rökstuðningi fyrir þessari hækkun.
Sagðist hann í bréfi sínu hafa verið í viðskiptum við Íslandsbanka frá stofnun hans og það sem hefði laðað hann að bankanum á sínum tíma hafi verið einstakt viðmót þjónustufulltrúa sem leiðbeindu honum í gegnum frumskóg ólíkra þjónustuleiða.
„Í mínum huga hafði Íslandsbanki alltaf ímynd “góða bankans”… en sú mynd hefur aðeins fölnað. Ég varð svolítið hissa þegar ég sá að þið hafið hækkað verðtryggða húsnæðivexti í kjölfar þess að stýrivextir lækkuðu. Þetta hljómar mjög mótsagnakennt og ég skil ekki þessa ákvörðun enda gerðu flestir sér vonir að lækkun stýrivaxta hefðu jákvæð áhrif, ekki síst þau sem eru með verðtryggð lán. Þegar virðist birta til, svona rétt fyrir jólin, verðbólga fer lækkandi, verðbólguvæntingar lækka, stýrivextir lækka og nánast enginn hagvöxtur þá bregðist þið við með því að herða tökin á fólki og hækka vexti á verðtryggðum lánum. Getið þið útskýrt fyrir mér sanngirnina í þessu og gert það á einfaldan og heiðarlegan hátt?“
Það er skemmst frá því að segja að Íslandsbanki svaraði Þórhalli og birtir hann svarið í færslu á Facebook-síðu sinni í morgun. Þar segir að skiljanlegt sé að fólk spyrji af hverju vextir hækka þegar aðrir lækka.
„Sú ákvörðun bankans að hækka verðtryggðu húsnæðislánavextina er samspil margra þátta, en til einföldunar má segja að fjármögnun á verðtryggðum lánum hefur hækkað þar sem verðbólga hefur lækkað hraðar en stýrivextir og við þannig aðstæður hækka raunvextir,“ segir í svarinu og því bætt við að bankinn fjármagni því verðtryggð lán með dýrari hætti.
„Stýrivextir eru nú 8,5% og spár gera ráð fyrir 2-3% árlegri verðbólgu næstu mánuði. Með því að draga vænta verðbólgu frá stýrivöxtum fæst að raunstýrivextir eru 5,5-6,5%. Það þýðir í raun það að bankinn er að fjármagna sig á 5,5-6,5% vöxtum til næstu mánaða, en hækkaði húsnæðislánavexti í 5,0%. Þrátt fyrir hækkunina í gær verður því neikvæður 0,5-1,5% vaxtamunur af þessum lánum næstu mánuði miðað við spár um verðbólgu. Það er von okkar að þetta útskýri þá vaxtabreytingu sem um ræðir.“
