Ása Berglind Hjálmarsdóttir sem er bæjarfulltrúi í sveitarfélaginu Ölfuss á Suðurlandi, auk þess að vera í 2. sæti á lista Samfylkingarinnar í Suðurkjördæmi fyrir komandi alþingiskosningar, andmælir harðlega áætlunum þýsks fyrirtækis um að reisa mölunarversmiðju í sveitarfélaginu. Vísar hún sérstaklega til neikvæðra áhrifa verksmiðjunnar á fiskeldi í nágrenninu og segir ekki hægt að velja bæði mölunarverksmiðjuna og fiskeldið.
Ása skrifar grein um þetta á Vísi en miðað við skoðanakannanir eru töluverðar líkur á því að Samfylkingin fái 2 þingmenn í Suðurkjördæmi og hún verði þar með þingmaður.
Ása rifjar upp að íbúakosningu um skipulagstillögu sem heimilar byggingu verksmiðjunnar og nýrrar hafnar í Þorlákshöfn hafi verið frestað og þýska fyrirtækinu Heidelberg, sem hefur í hyggju að reisa verksmiðjuna, falið að láta rannsaka áhyggjur fiskeldisfyrirtækisins First Water af áhrifum verksmiðjunnar á starfsemi þess.
Kosið verður um tillöguna samhliða alþingiskosningunum 30. nóvember og Ása segir liggja fyrir áhrif mölunarverksmiðjunnar myndu verða á fiskeldið í Ölfusi:
„Fiskeldisfyrirtæki gegna lykilhlutverki í efnahagslegum vexti svæðisins og stuðla að sjálfbærri próteinframleiðslu og nýsköpun. Hins vegar getur stöðugur titringur, mengun og mikill hávaði frá mölunarverksmiðju haft veruleg áhrif á þessi fyrirtæki framtíðaruppbyggingu þeirra.“
Ása segir að til standi að reisa mölunarverksmiðjuna nánast við hlið aðstöðu First Water og að skýrsla um umhverfisáhrif verksmiðjunnar hafi ekki kannað nægilega vel áhrif hennar á starfsemi fiskeldisfyrirtækisins:
„Rannsóknir sýna að stöðugur titringur getur haft neikvæð áhrif á vöxt, heilsu, streitu og afurðagæði fiska í landeldi. Slíkar aðstæður geta raskað lífeðlisfræðilegri starfsemi fiska, þar með talið ónæmiskerfi þeirra og næringarupptöku. Skert ónæmi eykur viðkvæmni fiska fyrir sjúkdómum, sem getur haft alvarlegar afleiðingar fyrir framleiðslu og afkomu fyrirtækjanna. Samhliða getur minni vaxtarhraði leitt til lægri afurðagæða og framleiðslu, sem skerðir hagkvæmni landeldisins og getur sett frekari áform um uppbyggingu í uppnám.“
Ása vísar einnig til skaðlegra áhrifa hávaða á fiskeldið og norskt fyrirtæki hafi gert úttekt sem sýni fram að þar sem fyrirhugað hafnarsvæði, vegna verksmiðjunnar, í Keflavík við Þorlákshöfn sé varasamt og auki hættu á umhverfisslysum. Hún segir Vegagerðina hafa sömuleiðis varað við því að reisa höfn á þessu svæði.
Að lokum segir Ása fyrirhugaða verksmiðju ógna bæði hagsmunum Ölfuss og Íslands alls:
„Ísland er í einstakri stöðu til þess að skapa sér sérstöðu í sölu og markaðssetningu á landeldisfiski á alþjóðavísu. Sterkt orðspor Íslands, græn orka og aðgengi að góðum vatnsgæðum og hreinu umhverfi eru lykilatriði þegar kemur að sölu á hágæða próteini um heim allan.
Fyrirætlanir um mölunarverksmiðju Heidelberg í Þorlákshöfn teflir í tvísýnu þeim miklu hagsmunum sem undir eru og mun, til lengri tíma litið, skaða ímynd Ölfus sem leiðandi sveitarfélags þegar kemur að grænni atvinnuuppbyggingu og framleiðslu á hágæða matvælum fyrir heimsmarkaðinn.“
Grein Ásu er hægt að lesa í heild sinni hér.
