Maður að erlendum uppruna var á fimmtudag dæmdur í eins mánaðar fangelsi fyrir að nefbrjóta annan á skemmtistaðnum Cafe Catalinu í Kópavogi. Hinn nefbrotni hafði ýtt í öxlina á kærustu mannsins.
Atvikið átti sér stað fimmtudagskvöldið 1. desember árið 2022 á skemmtistaðnum, sem er í Hamraborg í miðbæ Kópavogs.
Þolandinn í málinu var mjög ölvaður þetta kvöld og var að ónáða gesti staðarins sem voru að nota spilakassana. Kveikjan að árásinni var sú að hann ýtti í öxlina á kærustu hins erlenda manns. Steig hann þá upp og kýldi hinn drukkna mann sem féll í kjölfarið beint í gólfið.
Lögregla var tilkölluð á staðinn og var ekki hægt að taka skýrslu af þolandanum vegna ölvunar. Maðurinn sem kýldi hann sagðist hafa gert það með hálfkrepptum hnefa og ekki fast.
Viku síðar, þann 8. desember árið 2022, lagði þolandinn hins vegar fram kæru vegna líkamsárásar. Hann hefði verið kýldur og rankað við sér í stórum blóðpolli á gólfinu.
Í læknisvottorði kom fram að maðurinn væri nefbrotinn eftir að hafa verið kýldur á andlitið. En hann fékk einni kúlu aftan á hnakkann við fallið í gólfið.
Eigandi Catalinu staðfesti atburðarásina í símaskýrslu. Það er að þolandinn hafi verið með ögrandi tilburði gagnvart kærustu mannsins sem kýldi hann í kjölfarið. Hann hafi séð þetta í öryggismyndavélakerfinu en ekki náð að vista myndbandið.
Í skýrslutöku í júní árið 2023 breytti gerandinn framburði sínum og sagði að hann hafi viljað slá þolandann en ekki náð til hans. Hann hefði fallið í gólfið vegna ölvunar. Fyrir dómi sagði hann að þolandinn hafi lamið kærustu hans í bakið eftir að þau fóru að rífast um spilakassa. Aðspurður um hvers vegna hann hefði breytt framburði sínum sagðist hann hafa rætt við lögreglumennina á ensku og hann væri ekki sterkur í því tungumáli. Það hafi verið ranglega haft eftir honum í lögregluskýrslu að hann hefði kýlt þolandann í andlitið.
Þolandinn viðurkenndi að hafa komið við kærustuna en hann hafi hvorki slegið hana né meitt. Hann hafi orðið pirraður eftir að þau sökuðu hann um að fikta í spilakassanum þeirra. Þá hafi hann fundið fyrir þungu höggi í andlitið og rotast. Það næsta sem hann mundi var að lögregla og sjúkraflutningamenn voru að hjálpa honum inn í sjúkrabíl.
Sagðist hann ekki hafa verið ofurölvi og myndi greinilega eftir atvikum. Hann hafi verið blár og marinn og ekki getað stundað vinnu í nokkra daga eftir þetta.
Taldi dómari við Héraðsdóm Reykjavíkur sannað að gerandinn hafi veist að þolandanum með ofbeldi og slegið hann með hnefa í andlitið með áðurnefndum afleiðingum. Ástand þolandans og ögrandi háttsemi hafi ekki réttlætt líkamlegt ofbeldi og komi ekki til mildunar. Tafir í málinu komi hins vegar til refsilækkunar, en ákæra var ekki gefin út fyrr en 21. maí á þessu ári.
Var maðurinn dæmdur í eins mánaðar skilorðsbundið fangelsi til tveggja ára. Þá var hann dæmdur til að greiða um eina og hálfa milljón í málskostnað og þolandanum 400 þúsund krónur í skaðabætur.
