Vilhjálmur, sem er í hluthafahópi Heimildarinnar og var einn af eigendum Kjarnans, ræddi þar mál Þórðar Snæs Júlíussonar, fjölmiðlamanns og frambjóðanda Samfylkingarinnar fyrir komandi kosningar, en óhætt er að segja að gustað hafi um Þórð Snæ síðustu daga eftir að fjallað var um lítt geðsleg skrif hans á bloggsíðu fyrir margt löngu. Þórður Snær tilkynnti svo um helgina að hann myndi ekki taka sæti á Alþingi ef hann næði kjöri, en hann skipar þriðja sætið á lista Samfylkingar í Reykjavík norður.
„Þetta viðtal verður lengi í minnum haft, ekki síst fyrir það hversu mildan dóm Vilhjálmur felldi yfir vini sínum og samstarfsmanni til síðustu 10 ára. Meðferðin var næstum alveg hin sama og aðrir samferðamenn Vilhjálms hafa notið á síðustu árum þegar upp hafa komið áleitin mál og umdeild…….. eða hvað,“ spyr Stefán Einar í færslu á Facebook-síðu sinni og bætir við að í viðtalinu hafi Vilhjálmur viljað meina að atburðarásin nú væri í boði „áróðursdeildar“ hægrisins eða Sjálfstæðisflokksins sem staðsett væri í Hádegismóum og að þar væri glatt á hjalla við þau málalok sem nú blasa við. Þessu hafnar Stefán Einar.
„Í fyrsta lagi skal það tekið fram að það hlakkar ekki í heiðvirðu fólki við aðstæður sem þessar, jafnvel þótt einhverjum kunni að finnast niðurstaðan réttmæt. Og í öðru lagi er forvitnilegt að skyggnast inn í hugarfylgsni manns sem hefur fjármagnað svokallaðan „fjölmiðil“ síðustu ár og lýsir nú starfi Morgunblaðsins við að upplýsa almenning sem áróðursstarfi. Þessi sami maður hefur fjármagnað menn sem lítið annað gert en að hundelta fólk sem ekki hefur verið hluti af rétttrúnaðarkirkju Samfylkingarinnar síðustu 20 árin eða svo, fjallað um ummæli þeirra, bæði opinber og í einkaskilaboðum og gert allt til þess að ýta þessu sama fólki út á ystu nöf samfélagsins,“ segir Stefán Einar og bætir við:
„Vilhjálmur staðfesti með orðum sínum hvaða augum hann lítur fjölmiðla og það eitt og sér gerir hann algjörlega vanhæfan til að koma nærri alvöru fjölmiðlum.“
Stefán Einar fer svo yfir mál Þórðar Snæ og bætir við að upplýst hafi verið um það í Spursmálum í liðinni viku, þætti sem hann stýrir sjálfur og hefur vakið töluverða athygli og umræðu.
„Það er fréttnæmt að réttlætisriddari, sem tekið hefur sér mikið pláss í opinberri umræðu sem slíkur allt frá þeim tíma þegar greinarnar sem hér um ræðir birtust á vefnum, skuli gangast við þessum skrifum. (Hann hóf blaðamannsferilinn 2005). Hann hefur meðal annars notið gríðarlegs aðgengis að miðlum Ríkissjónvarpsins og Ríkisútvarpsins og þegið greiðslur fyrir að gaslýsa samfélagið vikulega á þess vegum. Þar hafa dómarnir ekki verið sparaðir,“ segir Stefán Einar og bætir við að Þórður hafi áður látið að því liggja að hann hafi ekki verið höfundur þessara skrifa.
„Það gerði hann í samskiptum við kollega sína, blaðamenn á Vísi árið 2007! Hann með öðrum orðum laug að, eða afvegaleiddi fjölmiðla með viðbrögðum sínum á þeim tíma.“
Að mati Stefáns er fráleitt að láta eins um og einhver bernskubrek sé að ræða sem ekki eiga erindi inn í umræðuna á þessum tímapunkti.
„Að halda því fram að hann sé gjörbreyttur maður nú og beri því ekki ábyrgð á því sem þarna birtist er enn fráleitara. Hann var kominn í stjórn UN Women!, sjö árum eftir að málið þar sem hann réðist af fullkomnu vægðarleysi á Rannveigu Rist komst í hámæli. Það segir sína sögu,“ segir hann og bætir við að enginn hafi krafist þess að Þórður SNær yrði rekinn af lista Samfylkingarinnar.
„Enginn, sem máli skiptir, krafðist þess að hann yrði „sviptur“ lífsviðurværi sínu eins og það var svo hátíðlega orðað á Sprengisandi, í sprenghlægilegri tilraun til þess að fórnarlambavæða Þórð Snæ,“ segir hann og spyr svo hvað hafi orðið til þess að Þórður Snær ákvað að stíga til hliðar.
„Var það hinn svakalega ósanngjarni fréttaflutningur? Var það opinber krafa eða fordæming á manninum? Nei. Fyrir því var bara ein ástæða. Kannanir Gallup, sem Samfylkingin styðst við í baráttu sinni, sýndu að flokkurinn tók á sig bylmingshögg vegna málsins. Fylgið hrundi af flokknum og hélt áfram að gera eftir því sem tíminn leið. 8 prósentustig hjá konum og 3 stig hjá körlum. Samanlagt 5 prósentustig!“
Stefán Einar segir að lokum að menn „rembist nú eins og rjúpan við staurinn“ að líkja skrifum Þórðar Snæs saman við uppákomuna á Klausturbar um árið.
„Þar gleymist að þau orð sem þar féllu voru ekki ætluð til opinberrar birtingar, ólíkt bloggskrifunum fyrrnefndu. Þau voru sögð í hópi vina sem töldu sig vera prívat en voru það ekki. Ummælin voru ámælisverð en margt er sagt í leynum sem ekki yrði sagt opinberlega. Það vita allir og viðurkenna. En skrif Þórðar voru opinber. Þeim var beinlínis útvarpað á internetinu. Og það sem meira er. Þau voru rituð undir dulnefni. Og af hverju ætli það hafi verið? Það var vegna þess að þau voru fest á blað, vitandi vits. Þar var enginn óviti á ferð.“
