Í grein sinni segir Heiðbrá, sem skipar 2. sætið á lista Miðflokksins í Suðurkjördæmi, frá því að hún hafi farið með dóttur sína á Símamótið í Kópavogi í sumar þar sem komnar voru saman þúsundir stúlkna víðs vegar af landinu. Þrátt fyrir leiðinlegt veður segir Heiðbrá að mótið hafi verið vel heppnað og eitt hafi sérstaklega staðið upp úr.
„Ég gleymi aldrei upplifuninni, gæsahúð inn að beini, þegar öll liðin streymdu inn á Kópavogsvöllinn og Sigga Ósk tók lagið „Áfram stelpur“ og allar sungu þær í kór með henni: „Áfram stelpur! Sýnið taktana, áfram stelpur, hæfileikana!“ Á einni helgi stækkaði litla stelpan mín um nokkur númer í sjálfsáliti og sjálfseflingu. Eftir þessa helgi var það hennar einlæga trú að hún gæti allt; hún gæti sigrað heiminn.“
Heiðbrá segir að þegar heim var komið hafi stemningin haldið áfram og „Áfram stelpur!“ ómað í húsinu margar vikur.
„Litli bróðir hennar, þá nýorðinn 3ja ára, var snöggur að byrja að hlaupa á eftir henni og kalla „Nei nei nei, áfram strákar!“ Og það rann upp fyrir mér, hvar er samfélagshvatningin til strákanna okkar? Til litlu drengjanna okkar? Hvar fá þeir að heyra einmitt „áfram strákar“?“
Í grein sinni bendir Heiðbrá á að samfélagsumræðan geti oft á tíðum verið eitruð, hvort sem það eru samfélagsmiðlar, fjölmiðlar, á kaffistofum eða jafnvel heima við eldhúsborðið.
„Allt of lengi hefur samfélagsumræðan snúist um að drengir séu ekki nóg, að drengir kunni ekki að lesa og að drengirnir okkar séu almennt að falla aftur úr. Þetta er samfélagsumræða sem hefur fengið að óma í þjóðfélaginu síðastliðin ár, hættuleg og smitandi orðræða. Hvaða skilaboð er verið að senda drengjunum okkar?“
Heiðbrá segir að drengirnir okkar séu ekki vandamálið heldur hafi kerfið brugðist.
„Skömmin liggur hjá stjórnvöldum og skólakerfinu sem hafa brugðist börnunum okkar. Með skólakerfinu á ég ekki við um kennarana, heldur kerfið sem stjórnvöld hafa búið kennurum og börnunum okkar. Kerfi sem hefur mistekist að taka utan um börnin okkar, mistekist að mæta þörfum þeirra og þar með mistekist að mennta börnin okkar. Kerfi sem hefur mistekist að mæta kennurum. Staðan er sú að meirihluti kennara sjá sig ekki við kennslu eftir 10 ár, sökum núverandi vinnuálags og skilningsleysis stjórnvalda. Kerfi sem stjórnvöld hafa neitað að horfast í augu við,“ segir hún.
Hún segir að Sjálfstæðisflokkurinn hafi vaknað og hlaupið af stað með yfirlýsingar um stórsókn og umbreytingar á menntakerfinu, aðgerðir séu rétt handan við hornið.
„Þetta er bara alltof lítið og alltof alltof seint. Trúverðugleikinn er horfinn, traustið er ekkert. Menntakerfi landsins þarfnast gagngerrar endurskoðunar, með því markmiði að bæta þjónustu, gæði og árangur,“ segir hún og bætir við að Miðflokkurinn telji nauðsynlegt að menntamálin séu sett ofar í forgangslistann og farið sé án tafa í stórtækar breytingar á kerfinu. Því með því að fjárfesta í menntamálum séum við að fjárfesta í framtíðinni.
