Kristrún Frostadóttir, formaður Samfylkingarinnar, hefur birt yfirlýsingu á Facebook-síðu sinni vegna sóðalegra bloggskrifa frambjóðandans Þórðar Snæs Júlíussonar, sem hafa verið fréttaefni í dag.

Niðurstaða Kristrúnar er í stórum dráttum sú að hún fordæmir skrifin en telur að Þórður Snær eigi að fá annað tækifæri. Bendir hún á að hann hafi beðist einlæglega afsökunar. Kristrún skrifar:

„Ég hef séð þessi skrif sem birtust á bloggsíðu Þórðar Snæs og viðurkenni að það er ótrúlega erfitt fyrir mig sem konu að lesa þennan texta. Mér leið eins og ég hefði verið kýld í magann þegar ég las þetta.

Mér finnst gjörsamlega ömurlegt að þurfa að svara fyrir svona lagað en svar mitt er eftirfarandi:

Eins og flestir vita höfum við í Samfylkingunni verið í fararbroddi í samfélaginu á sviði jafnréttismála og ætlum okkur að vera það áfram. Það þarf því vart að taka fram að þessi skrif endurspegla í engu stefnu flokksins.

Textinn er skrifaður fyrir tæpum 20 árum af ungum manni sem var greinilega fullur af óöryggi og einhvers konar reiði sem endurspeglast í þessum subbulegu skrifum.

Ég hef rætt við Þórð. Hann skammast sín djúpt fyrir skrifin, og má og á að skammast sín. Ég tel mig hins vegar vita að þessi bloggsíða gefi ekki rétta mynd af hans persónu í dag eða skoðunum hans og sýn á samfélagið.

Mín skoðun er sú að við eigum að gefa fólki tækifæri til að bæta ráð sitt. Fólk þroskast og breytist, og getur sannarlega gert það á 20 árum. Mér finnst að fólki eigi að njóta sannmælis þegar það bætir ráð sitt í raun og veru. Það getur Þórður aðeins gert með sínum verkum. Þórður hefur tekið fulla ábyrgð á málinu og beðist afsökunar, án fyrirvara. Hann þarf að sýna með verkum sínum að hann sé ekki sá maður sem birtist í þessum gömlu skrifum.

Ég vona að það gangi vel.“

Sjá einnig: Verstu skrif Þórðar Snæs úr blogginu alræmda – „Hún var ekki með brjóst, samt með vömb, stóran rass, stuttar lappir, gróft hár og þrútið andlit“

Um er að ræða bloggfærslur frá árunum 2004 til 2007. Elstu færslurnar voru skrifaðar þegar Þórður Snær var 24 ára gamall námsmaður í Skotlandi en þær yngstu þegar hann var 27 ára gamall blaðamaður á 24 stundum. Mikið ber á niðrandi lýsingum á úliti kvenna í þessum bloggfærslum, sem og fitusmánun. Einnig bera sumar færslurnar með sér mikla andúð á feminisma, sem og dýrkun á klámi og sjálfsfróun karla.