Ferðamaður var vitni að því að því í gær að þriggja manna fjölskylda var hætt komin í Reynisfjöru. Faðirinn náði að bjarga konu sinni og ungri dóttur þegar aldan reyndi að hrifsa þau á haf út.

Ferðamaðurinn gerir grein fyrir þessu á samfélagsmiðlinum Reddit í gær og segir að atvikið hafi gerst fyrr um daginn.

„Í dag var þriggja manna fjölskylda nærri hrifsuð á haf út í Reynisfjöru. Barnið var sennilega 10 eða 11 ára,“ segir hann. „Þau voru óábyrg og að leika sér að öldunum. Sem betur fer náði maðurinn að toga eiginkonu sína og dóttur úr öldunni, annars hefði eitthvað hræðilegt komið fyrir.“

Segist hann hafa verið í Reynisfjöru með þriggja ára dóttur sinni og sjötugri móður. Voru þau að taka myndir úr fjarlægð en náðu þó ekki mynd af atvikinu.

„Ég er enn þá reiður út í þessa foreldra sem komu barni sínu í þessa hættu,“ segir hann. „Fólk hunsar aðvörunarskiltin og fer og leikur sér að öldunum. Sjórinn var sérstaklega hættulegur í dag út af vindi og rigningu.“

Kannski ekkert hægt að gera

Hafa spunnist nokkrar umræður um færsluna og segja sumir að þetta sé alls ekki einsdæmi.

„Þetta gerist því miður ná næstum því hverjum degi. Kannski þarf að setja upp eitt stórt skilti,“ segir einn netverji.

Annar nefnir að það gæti hjálpað að setja upp skjá með myndbandi af hættulegu atviki úr fjörunni, til þess að fólk gæti séð hvernig sjórinn reynir að hrifsa til sín fólk.

„Óvinsæl skoðun en …. það eru viðvörunarskilti þarna. Það er líka hægt að lesa allt um þessa hættu á internetinu en það virðist samt ekki vera nóg. Kannski verður aldrei hægt að birgja brunninn fyrir sumt fólk,“ segir annar.