Þráinn Stefánsson, 62 ára Íslendingur sem býr í Tælandi, brá mjög í brún er Facebook-vinur hans til margra ára fór allt í einu að hafa í hótunum við hann. Sendi honum m.a.s. mynd af byssu og hótaði því að gera ástvinum hans mein.
Facebook-vinurinn er eldri maður, öryrki. Þráinn hefur ávallt álitið hann vera friðsamlegan enda rann fljótlega upp fyrir honum að um var að ræða hakkara, Facebook-reikningur vinarins hafi verið yfirtekinn. En hakkarinn þekkti nöfn á nánum ættingjum Þráins, hann nafngreindi fólkið sem hann sagðist ætla að vinna mein.
Þráinn greinir DV frá því að fyrst hafi hann fengið eftirfarandi skilaboð:
Sendandinn skipaði Þráni ítrekað að smella á tengilinn en Þráinn neitaði því.
„Upphaflega sendir hann mér fyrirspurn um hvort ég hafi fengið kóða frá Facebook. Ég svara nei. Hann margsendir og segir mér að athuga betur. Ég svara honum og segist engan kóða hafa fengið. Hann vildi að ég smellti á linkinn en ég sagðist ekki vilja fara inn á þetta, ég treysti engu svona. Upp úr því byrja hótanir. Ég segi þá bara: Er ekki allt í lagi með þig? Þetta var sent frá Facebook-reikningi gamals Facebook vinar míns sem er eldri maður og öryrki. Einhver annar hefur tekið yfir síðuna hans, það er klárt mál. En sá sem er að skrifa þetta þekkir vel til mín og minnar fjölskyldu.“
Hér má sjá orðrétt dæmi (fyrir utan úrfelld nöfn) um hótanir hakkarans:
„Kannski er þetta mjög fallegt fyrir þig er ég nota það á þig“
„Eða þetta verður fínt er ég nota þetta á […]“
„Allt í lagi ég leita af henni og er ég er búinn að blása af henni höfuðið sendi ég þad til þin“
„[…] er fyrsta skotmarkið mitt“
„Ég skal þurrka ykkur öll og láta þig kveljast Þurrka út alla fjölskylduna þina“
„Sá eini er getur frelsað þig er ég gerðu greiða“
Þráinn segir að sér hafi verið mjög brugðið yfir hótunum, byssumyndinni og því að sá sem hótaði honum nafngreindi ástvini hans. En smám saman rann upp fyrir honum að þetta væru líklega innistæðulausar hótanir. Orðfæri aðilans var mjög sérkennilegt og bar keim af vélþýðingum.
Þráinn brást klárlega rétt við með því að neita ósk mannsins um að smella á tengilinn.
„Ég ætla að tilkynna þetta til lögreglunnar á Íslandi,“ segir Þráinn.
Mikilvægt er fyrir alla að gæta þess að smella ekki á torkennilega tengla sem FB-vinir gætu sent í skilaboðum á Messenger. Ef um að ræða svipaðan tengil og hér um ræðir þá má slá því föstu að ekki er um að Facebook-vininn að ræða heldur erlendan hakkara og glæpamann.
