Lengi hefur verið vitað að Norður-Kórea sér Rússum fyrir vopnum og skotfærum til að nota í stríðinu í Úkraínu og nú hafa Norðurkóreumenn einnig sent hermenn til að berjast við hlið rússneskra hermanna. Nú hafa upplýsingar um leynilega áætlun Pútíns varðandi þetta lekið út.

The Economist, The Wall Street Journal og Kyiv Post skýrðu nýlega frá ýmsum atriðum í samningi ríkjanna. Þau gerðu „samstarfssamning“ í sumar þegar Vladímír Pútín, sem er í raun einræðisherra í Rússlandi, heimsótti starfsbróður sinn Kim Jong-un í Norður-Kóreu.

Í samningnum er að sögn Pútíns kveðið á um gagnkvæma aðstoð ríkjanna ef ráðist er á annað þeirra. Þetta sagði hann á fréttamannafundi þegar samningurinn var undirritaður. Við það tækifæri sagði hann einnig að Rússlandi útiloki ekki hernaðarsamstarf við Norður-Kóreu.

Kyrylo Budanov, yfirmaður leyniþjónustu úkraínska hersins, sagði í samtali við The Economist að megininnihald samningsins sé að Norður-Kórea eigi að leggja Rússum til hermenn, herforingja og hershöfðingja sem eigi að berjast með Rússum í Úkraínu. Þess utan skuldbatt Norður-Kórea sig til að senda Rússum 1,8 milljónir skotfæra áralega auk flugskeyta.

Á móti muni Rússar veita Norður-Kóreu efnahagsaðstoð og láta þeim tækniþekkingu í té. Þar sé um að ræða háþróaða tækni. Einnig muni þeir aðstoða Norður-Kóreu við þróun og smíði kjarnorkuvopna. Nánar tiltekið muni Rússar aðstoða við þróun vígvallarkjarnorkuvopna og kerfa til að skjóta flugskeytum úr kafbátum.