Bergþór Ólason, þingflokksformaður Miðflokksins, segir að núverandi utanríkisráðherra, Þórdís Kolbrún Reykfjörð Gylfadóttir, neiti að afhenda bréf sem Guðlaugur Þór Þórðarson, fyrrverandi utanríkisráðherra, sendi Eftirlitsstofnun EFTA (ESA) í tíð sinni í ráðuneytinu þar sem bókun 35 var mótmælt.

Bergþór skrifar grein um þetta í Morgunblaðið í dag og kveðst hafa fengið skriflega neitun um að fá þessi bréf afhent.

Hann segir í grein sinni að svo virðist vera sem helsta og eina áhersluatriði Þórdísar Kolbrúnar á þessu lokaþingi kjörtímabilsins sé að koma bókun 35 í gegn. Þingflokkur Sjálfstæðisflokksins fylgi svo í humátt á eftir.

Stimpillinn frá Evrópu trompi allt annað

„Til upp­rifj­un­ar geng­ur inn­leiðing bók­un­ar 35 út á að festa í sessi að ef regla sem Alþingi set­ur reyn­ist ósam­rýman­leg reglu sem Alþingi inn­leiðir á grund­velli EES-samn­ings­ins skuli sú frá Evr­ópu gilda. Verður þá vikið til hliðar regl­um ís­lensks rétt­ar eins og að yngri lög gangi fram­ar eldri, að sér­lög gangi fram­ar al­menn­um lög­um og svo mætti áfram telja. Stimp­ill­inn frá Evr­ópu skal trompa annað, stang­ist laga­regl­ur á,“ segir Bergþór.

Hann segir að margir hafi spurt hvers vegna þessi ofuráhersla sé á að innleiða bókun 35 með þeim hætti sem utanríkisráðherra leggur til. „Haf­andi í huga að eng­ar at­huga­semd­ir voru gerðar, frá til þess bær­um aðilum, nær all­an tím­ann sem Ísland hef­ur verið aðili að EES-samn­ingn­um. Enn áleitn­ari verður sú spurn­ing þegar fyr­ir ligg­ur að fyrr­ver­andi ut­an­rík­is­ráðherra, Guðlaug­ur Þór Þórðar­son, tók til varna fyr­ir Ísland á síðasta kjör­tíma­bili og sendi ein þrjú bréf til ESA (eft­ir­lits­stofn­un­ar EFTA) þess efn­is.“

Stenst enga skoðun

Bergþór bendir á að þar hafi núverandi fyrirkomulag verið sagt fullnægjandi, enda ljóst að EES-samningurinn hefði aldrei verið samþykktur á sínum tíma hefði kröfunni um innleiðingu bókunar 35 verið haldið uppi þá með þeim hætti sem nú er gert.

„Það eru sem sagt til þrjú bréf sem ut­an­rík­is­ráðherra Sjálf­stæðis­flokks­ins sendi eft­ir­lits­stofn­un EFTA á síðasta kjör­tíma­bili þar sem þess­um kröf­um var mót­mælt og ekki tal­in ástæða til breyt­inga frá því fyr­ir­komu­lagi sem viðhaft hef­ur verið frá upp­hafi. En nú­ver­andi ut­an­rík­is­ráðherra, Þór­dís Kol­brún Reyk­fjörð Gylfa­dótt­ir, neit­ar að af­henda þessi bréf til þing­manna. Und­ir­ritaður hef­ur óskað eft­ir þeim en fengið skrif­lega neit­un. Þing­menn eiga ekki að fá að sjá varn­ir og sjón­ar­mið Íslands á liðnu kjör­tíma­bili. Það stenst auðvitað enga skoðun að bréf­in séu háð trúnaði, enda er ráðherr­ann búin að fella all­ar varn­ir Íslands í mál­inu nú þegar,“ segir Bergþór í grein sinni í Morgunblaðinu.

Hann segir að engar skýringar hafi fengist á þessum „feluleik“ ráðherrans gagnvart Alþingi.

„Hún kýs að halda kjarna­gögn­um leynd­um í mál­inu – gögn­um sem varpa ljós á það af hverju Ísland ætti ekki að inn­leiða bók­un 35. Vill ráðherr­ann kannski ekki djúpa og ígrundaða umræðu um þetta eina þing­mál sitt? Þing­flokk­ur Miðflokks­ins mun ekki láta á sér standa í umræðum um bók­un 35 á Alþingi. Við stönd­um með hags­mun­um Íslands, nú sem fyrr.“