Frá árinu 2021 og fram í júní á þessu ári hafa Íslandsbanki, Arion banki og Landsbankinn halað inn 462,6 milljörðum króna í hreinar vaxtatekjur. Frá þessu er greint í nýjasta tölublaði Heimildarinnar.

Eins og kunnugt er voru stýrivextir lækkaðir lítillega í vikunni og er það í fyrsta sinn í rúm þrjá ár sem vextir lækka. Háir stýrivextir hafa áhrif á skuldsett heimili og í umfjöllun Heimildarinnar er ljósi varpað á það hvernig helstu viðskiptabankarnir hafa hagnast ævintýralega á síðustu árum á meðan kostnaðurinn hefur lagst á heimilin.

Bent er á það að bankarnir þrír hafi hagnast um 268,4 milljarða króna frá árinu 2021 og fram á mitt þetta ár. Skýrist hagnaðurinn að miklu leyti af vaxtamun bankanna; sum sé muninum á þeim vaxtatekjum sem bankarnir innheimta og vaxtagjöldum sem þeir greiða.

Sem fyrr segir hafa bankarnir fengið 462,6 milljarða króna, þar af 77 milljarða á þessu ári, í hreinar vaxtatekjur á þremur og hálfu ári.

Á sama tíma hafa heimili landsins þurft að greiða mikla vexti. Í umfjöllun Heimildarinnar er vísað í tölur sem Hagstofa Íslands birti fyrr í vikunni þar sem fram kom að heimili landsins hafi samtals greitt 109 milljarða í vaxtagjöld árið 2023. Árið 2022 voru þetta 86 milljarðar og árið 2021 tæpir 70 milljarðar. Á fyrri hluta þessa árs hafa heimilin svo greitt 61,5 milljarða í vaxtagjöld.

Nánar er fjallað um þetta í nýjasta tölublaði Heimildarinnar.