„Hitinn stefnir í að verða markvert undir meðallagi. Það er sem nemur a.m.k. einu staðalfráviki undir 30 ára meðaltalinu, 1991-2020,“ segir Einar í færslu á Facebook-síðu Bliku og bætir við að þar með verði þetta þriðji mánuðurinn í röð, bæði í Reykjavík og á Akureyri, sem telst markvert kaldur.
„Ágúst var meira en einu stigi kaldari en í meðalári og september tæpum tveimur stigum,“ segir hann.
„Þeir skiptast nú nokkuð á alla jafnar kaldir og hlýir mánuðir og nánast meðalmánuðir í hita inn á milli. Þannig eru sveiflurnar. En að fá nú þrjá þetta kalda mánuði í röð er heldur mikið að mínu mati,“ segir hann og bætir við að það sé ekki hending að þeir raðist svona saman. Veðrið hafi haft ýmis einkenni kuldatíðar mest allan þennan tíma, eða raunar frá því um 20. Júlí.
„Á háloftakortum birtist að jafnaði skarpt drag yfir landinu frá 1. ágúst. Því hafa fylgt tíðar N-átt og hitinn í um 1.200 til 1.300 m hæð (850 hPa) hefur verið um 1,0 til 1,5°C undir meðallagi að jafnaði. Slíkur kuldi þarna uppi skilar sér til jarðar,“ segir hann.
Hann segir að í Reykjavík hafi fimm af síðustu tólf mánuðum, frá nóvember 2023, verið markvert kaldir. Þrír til viðbótar heldur minna kaldir og enginn mánaðanna síðasta árið telst vera markvert hlýr. Síðasti þess konar mánuður kom í Reykjavík í ágúst í fyrra.
„Á Akureyri teljast 7 af síðustu 12 mánuðum hafa verið markvert kaldir. 2 hins vegar markvert hlýir (maí og júlí). Nú þegar þrír dagar eru eftir af þessum mánuði stefnir í að októberhitinn á Akureyri verði sá lægsti í meira en 40 ár (frá 1981). En eins og ævinlega spyrjum við að leikslokum!“
