Hallgrímur skaut léttum skotum á Snorra í þætti Gísla Marteins síðastliðið föstudagskvöld en í þeim þætti gagnrýndi hann einnig Bjarna Benediktsson forsætisráðherra á eftirminnilegan hátt vegna ummæla hans um útlendingamál.
Segir Hallgrím hafa afhjúpað Bjarna í beinni – „Takk Hallgrímur“
Snorri skrifaði grein á Vísi í gær þar sem hann fór yfir þetta og ræddi meðal annars stöðu íslenskunnar. Ræddi hann um að mistekist hefði hrapallega að tryggja að aðfluttir hér á landi tileinki sér tungumálið, svo illa að í alþjóðlegri skýrslu fái Íslendingar falleinkunn.
Snorri vísaði svo í ummæli Hallgríms í þætti Gísla Marteins þar sem hann benti á að það séu helst útlendingar sem byggi húsin hér á landi.
„Eigum við ekki að sýna þessu fólki smá virðingu?“ spurði Hallgrímur og hélt áfram: „Við hvað erum við hrædd? Sushi, enchilada eða kebab? Þetta er bara svo sorglegt.“ Hallgrímur lauk máli sínu svo á skýrum skilaboðum: „Eina útlendingavandamálið er bara hjá þessum pólitíkusum sem eru á fallanda fæti, sem eru að reyna að reisa sig við með einhverjum ömurlegum kommentum.“
Snorri benti svo á að margir hafi hrifist af afgreiðslu Hallgríms, til dæmis Hjálmar Gíslason einn eigenda Heimildarinnar sem sagði á Facebook: „Vá, hvað Hallgrímur negldi þetta. Það þarf ekki að segja fleira um útlendingamál fyrir þessar kosningar. Umræðan getur snúist um eitthvað annað.“
Snorri sagði í grein sinni að þetta væri lýsandi þversögn fyrir stjórnmálaumræðu okkar tíma.
„Á aðra höndina höfum við augljóst og alvarlegt útlendingavandamál, eins og stöðu tungumálsins hjá nýbúum. Á hina höndina höfum við þennan áhrifamikla álitsgjafa í vinsælasta sjónvarpsþætti landsins, sem útskýrir fyrir okkur að ef menn voga sér að ýja að einhverju sem heitið gæti útlendingavandamál, falli þeir sjálfkrafa í flokkinn „á fallanda fæti“. Þeir verða að einhvers konar illmennum.“
Hallgrímur svaraði þessum pistli Snorra stuttlega á Facebook-síðu sinni í gær og gerði það meðal annars með myndbroti af ummælum sínum í þætti Gísla á föstudagskvöld. Hann sagði þó einnig:
„Fólk er að biðja mig að svara grein eftir Snorri Másson en jólavertíðin er hafin, fastur í viðtölum í dag og upplestur á Skaganum í kvöld, kemst bara ekki til þess. En mundi þá að ég var auðvitað þegar búinn að svara honum, hjá Gísla Marteini. Það kemur hér. Við biðjum öll fyrir framtíð þessa unga efnismanns.“
