Ísraelsmenn notuðu orustuþotur við árásirnar og var þetta í fyrsta sinn í sögunni sem ísraelskar orustuþotur flugu inn í íranska lofthelgi. Þær gerðu meðal annars árásir á höfuðborgina Teheran.
Margir sérfræðingar segja að með árásinni hafi Ísraelsmenn niðurlægt Írani sem hafa lengi reynt að halda átökum fjarri eigin landi en hafa þess í stað nýtt sér leppsveitir hryðjuverkasamtaka á borð við Hamas og Hizbollah til að ráðast á Ísrael.
Ísraelski herinn segir að skotið hafi verið á sérvalin skotmörk og hafi þetta verið svar við margra mánaða viðvarandi árásum frá Íran. Meðal skotmarkanna voru loftvarnarvopn og verksmiðjur þar sem flugskeyti eru smíðuð.
Rasmus Elling, sérfræðingur í írönskum málefnum og lektor við Kaupmannahafnarháskóla, sagði í samtali við TV2 að bæði Hamas og Hizbollah eigi nú í vök að verjast í átökunum við Ísrael og geti því ekki sinnt hlutverki sínu sem framlenging á vörnum Íran. Því hafi stríðið nú borist inn í Íran og sýni þar með veikleika Írana.
Allar ísraelsku orustuþoturnar snéru heim aftur heilar á húfi en auk orustuþota voru eftirlitsflugvélar og flugvélar, sem sinna eldsneytisáfyllingu, með í för. Samkvæmt The Jerusalem Post tóku rúmlega 100 flugvélar þátt í árásinni, þar á meðal hinar fullkomnu F-35 orustuþotur.
Ekki liggur fyrir hvaða leið flugvélunum var flogið til og frá árásunum en ríkin tvö eiga ekki landamæri saman. Sérfræðingar telja líklegt að þeim hafi verið flogið yfir Írak og Sýrland en ísraelskar herflugvélar fljúga stundum inn í lofthelgi þessara ríkja og hafa nánast algjört frelsi til að athafna sig enda hafa Ísraelsmenn ítrekað ráðist á skotmörk í Sýrlandi og Írak.
