Samkvæmt verðlagseftirliti ASÍ hefur versluninni Prís tekist að vera með lægsta vöruverð á matvörumarkaði þá þrjá mánuði sem verslunin hefur starfað. ASÍ birti í gær niðurstöðu könnunar sinnar um verðlag í september og október og kemur þar m.a. fram að Prís var í langfelstum tilfellum með lægsta verð á vörum.
Könnun ASÍ leiddi einnig í ljós að eftir tveggja mánaða lækkun á verðlagi matvöru hækkar matvara nú á ný. Aðspurð um þetta segir Gréta María Grétarsdóttir, forstjóri Prís: „Það er eitthvað sem við ráðum illa við þegar koma hækkanir á lambakjöti vegna hærra afurðaverðs til bænda, en að öðru leiti erum við almennt ekki að hækka verð held heldur halda því eins lágu og við mögulega getum.“
Gréta segir að gott jafnvægi sé komið á í starfsemi verslunarinnar og viðtökur viðskiptavina séu afar góðar. „Ég upplifi að viðskiptavinir hafa tekið mjög vel í þetta. Ég skal vera hreinskilin og segi að með því að koma í Prís ertu að styðja við lægra matvöruverð á Íslandi og þetta hefur líka haft áhrif á verðbólgutölur. Ferð í Prís er vörn gegn verðbólgu.“
Gréta segir samkeppnina harða en það hefur komið henni á óvart að keppinautar hennar hafa beitt hótunum. „Við erum að upplifa það að það er verið að hóta birgjum og framleiðendum, að taka vörurnar þeirra úr sölu. Það kemur manni á óvart, í stað þess að svara inn á vellinum þá er farið í manninnn en ekki boltann.“
DV spyr Grétu hvaða aðferðum Prís beiti til að vera alltaf með lægsta verðið. „Við leitum leiða í öllu sem við gerum til að gera hlutina á hagkvæmari hátt, til dæmis í tækniútfærslum, þá spyrjum við okkur alltaf hvort þetta sé ódýrasta leiðin. Það sama gildir um hvernig við mönnum okkur og hvernig við skipuleggjum búðina. Við spyrjum okkur alltaf: Getum við gert þetta á hagkvæmari hátt? Til að geta skilað lægra verði. Eitt er auglýsingarnar. Við erum ekki í einhverjum production-auglýsingum heldur leitum við leiða til að spara í markaðssetningu og gerð markaðsefnis til að viðskiptavinurinn fái lægra verð.“
Gréta minnir á að núna sé tími kosningaloforðanna þegar kosningar eru framundan og hún leggur áherslu á mikilvægi þess að standa við loforðin. „Við höfum staðið við okkar loforð og ætlum að gera það áfram. Við ætlum að bjóða lægsta verð á markaði. Fólk á að koma í Prís ef það vill sniðganga verðhækkanir og styðja við samkeppni, reynslan hefur sýnt að samkeppnin bregst við með því að lækka verð. Þannig að ef Prísa væri ekki á markaðnum þá væri verð hærra.“
