Guðmundur Andri viðrar þessa skoðun á Facebook-síðu sinni og er tilefnið væntanlega umræður sem voru meðal annars í Pallborðinu á Vísi á mánudag. Þar sagði Brynjar Níelsson, hæstaréttarlögmaður og fyrrverandi þingmaður, meðal annars þetta:
„Mér finnst það ekki góð þróun að stjórnmálaflokkur sé bara eins og hver önnur hilluvara fyrir frægt fólk,“ segir hann. „Ef menn ætla að drösla einhverju frægu og þekktu fólki, þá er ágætt að þetta fólk hafi einhvern tímann talað um stjórnmál eða þjóðfélagsmál. Þannig að menn viti eitthvað um það.“
Guðmundur Andri segist í færslu sinni ekki skilja hvers vegna „álitsgjafaspekingarnir“ telja þessa þróun vera áhyggjuefni, eða hvers vegna lítið er gert úr þessu fólki með því að tala um frægt fólk.
„Ég skil ekki hvers vegna það er talinn ljóður á ráði fólks að hafa eitthvað til brunns að bera. Ég held að það sé prýðilegur undirbúningur fyrir þingmennsku að hafa starfað við sóttvarnir eða aðrar almannavarnir, löggæslu eða fjölmiðla. Öll þessi störf efla félagsþroska og hæfileika til að taka ákvarðanir og snúast um að leysa verkefni eins hratt og vel og kostur er,“ segir Guðmundur Andri sem sat á Alþingi fyrir Samfylkinguna á árunum 2017 til 2021.
„Of mikið af því stjórnmálastússi sem ég horfði upp á snerist um að spila einhvern endalausan Svarta-Pétur og gæta þess að koma vel út sjálfur en láta alla hina líta út eins og illgjarna hálfvita. Það fólk sem ég sé koma nýtt í stjórnmálin núna sýnist mér nú ekki líklegt til að taka þátt í slíkum leikjum.“
Margir leggja orð í belg við færslu Guðmundar og einn þeirra er Brynjar Níelsson. Hann segir:
„Það er ekkert að því að frægt fólk fari í pólitík. Hins vegar full ástæða til að hæðast að flokkunum sem reyna að sækja frægt fólk, sem engan áhuga hefur sýnt á stjórnmálum, til að afla fylgis.“
